ഗവർണറുടെ അധികാര പരിധി ഉൾപ്പെടുത്തിയ പാഠപുസ്തകം പുറത്തിറക്കി കേരള സർക്കാർ. പത്താം ക്ലാസ് സാമൂഹ്യശാസ്ത്രം പുസ്തകത്തിലെ ‘ജനാധിപത്യം; ഒരു ഇന്ത്യൻ അനുഭവം’ എന്ന പാഠഭാഗത്തിലാണ് ഗവർണറുടെ അധികാര പരിധി ഉൾപ്പെടുത്തിയിരിക്കുന്നത്. ഗവർണർ സംസ്ഥാനത്തിന്റെ നാമമാത്ര തലവനാണെന്നും യഥാർത്ഥ കാര്യനിർവഹണ അധികാരം നിക്ഷിപ്തമായിരിക്കുന്നത് മുഖ്യമന്ത്രി തലവനായ മന്ത്രിസഭയിലാണെന്നും പുസ്തകത്തിൽ പറയുന്നു.
ഗവർണറുടെ പ്രധാന അധികാരങ്ങളും ചുമതലകളും പാഠപുസ്തകത്തിൽ ഉൾപ്പെടുത്തിയിട്ടുണ്ട്. ഗവർണർ എന്നത് തിരഞ്ഞെടുക്കപ്പെട്ട ഒരു ഔദ്യോഗിക സ്ഥാനമല്ല. ഗവർണർ അധികാരങ്ങൾ നിർവഹിക്കേണ്ടത് മന്ത്രിസഭയുടെ ഉപദേശപ്രകാരമാണ്. ഗവർണർമാർ മുഖ്യമന്ത്രിയുടെ നേതൃത്വത്തിലുള്ള മന്ത്രിസഭയെ നിയന്ത്രിക്കുന്ന അധികാരികളല്ല. കേന്ദ്രസർക്കാരുകൾ ഗവർണർമാർ മുഖേന സംസ്ഥാനങ്ങളുടെ ഭരണഘടന അവകാശങ്ങളിൽ ഇടപെടുന്നു. കേന്ദ്രാവിഷ്കൃത പദ്ധതികളിലും വിഭവങ്ങളുടെ വിതരണത്തിലും രാഷ്ട്രീയം കലരുന്നുവെന്നും പാഠഭാഗത്തുണ്ട്.
സർക്കാർ- ഗവർണർ പോര് രൂക്ഷമായതിനെ തുടർന്ന് ഗവർണറുടെ അധികാരപരിധികൾ പാഠ പുസ്തകത്തിൽ ഉൾപ്പെടുത്തുമെന്ന് വിദ്യാഭ്യാസ മന്ത്രി വി ശിവൻകുട്ടി അറിയിച്ചിരുന്നു. കേരളത്തിന്റെ ഗവർണർ സ്ഥാനത്ത് നേരെത്തെ ഉണ്ടായിരുന്ന ആരിഫ് മുഹമ്മദ് ഖാനും സർക്കാരും തമ്മിൽ അഭിപ്രായ ഭിന്നതകൾ രൂക്ഷമായിരുന്നു. പിന്നീട് ഗവർണർ സ്ഥാനത്തേയ്ക്ക് എത്തിയ രാജേന്ദ്ര ആർലേക്കറും സർക്കാരും തമ്മിൽ തുടക്കത്തിൽ വലിയ പ്രശ്നങ്ങളുണ്ടായിരുന്നില്ല. എന്നാൽ ആർഎസ്എസ് പരിപാടികളിൽ സ്ഥാപിക്കുന്ന കാവിക്കൊടിയേന്തിയ വനിതയുടെ ചിത്രം രാജ്ഭവനിൽ ഉപയോഗിച്ചതോടെ ഗവർണർ- സർക്കാർ പോര് ആരംഭിച്ചിരുന്നു.