പ്രവാസികള്ക്ക് സര്ക്കാര് പ്രഖ്യാപിച്ച ധനസഹായത്തിന് അപേക്ഷിക്കുമ്പോള് വിമാന ടിക്കറ്റ് നിര്ബന്ധമില്ലെന്ന് നോര്ക്ക. നേരത്തെ ധനസഹായത്തിന് ഓണ്ലൈന് അപേക്ഷയോടൊപ്പം വിമാന ടിക്കറ്റ് സമര്പ്പിക്കണമെന്ന് നിര്ദേശിച്ചിരുന്നു. എന്നാല് വിമാന ടിക്കറ്റ് നിര്ബന്ധമല്ലെന്നും നാട്ടില് എത്തിയ തിയതി തെളിയിക്കുന്ന പാസ്പോര്ട്ട് പേജ് അപ്ലോഡ് ചെയ്താല് മതിയെന്നും നോര്ക്ക സിഇഒ അറിയിച്ചു.
കാലാവധി കഴിയാത്ത വിസ, പാസ്പോര്ട്ട് ഉള്ളവര്ക്കും ലോക്ഡൗണ് പ്രഖ്യാപിച്ചശേഷം വിസ കാലാവധി കഴിഞ്ഞവര്ക്കുമാണ് ആനുകൂല്യം ലഭിക്കുക. ടിക്കറ്റിന്റെ പകര്പ്പ് ഇല്ലെന്ന കാരണത്താല് അപേക്ഷ നിരസിക്കില്ല. മേയ് 5 വരെ ധനസഹായത്തിനായുള്ള അപേക്ഷ സ്വീകരിക്കും.
ഈ വര്ഷം ജനുവരി ഒന്നിനോ ശേഷമോ നാട്ടിലെത്തുകയും മടങ്ങിപ്പോകാതിരിക്കുകയും ചെയ്ത വിദേശ മലയാളികള്ക്ക് 5000 രൂപയുടെ ധനസഹായമാണ് സര്ക്കാര് പ്രഖ്യാപിച്ചിരിക്കുന്നത്.