പാപ്പനംകോട് ന്യൂ ഇന്ത്യ ഇന്‍ഷുറന്‍സ് കമ്പനിയുടെ ഓഫീസിലുണ്ടായ തീപിടുത്തത്തില്‍ രണ്ട് പേര്‍ മരിച്ച സംഭവം കൊലപാതകമെന്ന് സ്ഥിരീകരിച്ച് പൊലീസ്. കത്തിക്കരിഞ്ഞ നിലയില്‍ കണ്ടെത്തിയ രണ്ട് മൃതദേഹങ്ങളില്‍ ഒന്ന് സ്ഥാപനത്തിലെ ജീവനക്കാരിയുടേതാണെന്ന് പൊലീസ് സ്ഥിരീകരിച്ചിരുന്നു. ഇതോടൊപ്പം കണ്ടെത്തിയ രണ്ടാമത്തെ മൃതദേഹം വൈഷ്ണയുടെ ഭര്‍ത്താവ് ബിനുകുമാറിന്റേതാണെന്നാണ് പ്രാഥമിക നിഗമനം.
പൊലീസിന്റെ നിഗമനങ്ങള്‍ക്ക് പിന്‍ബലം നല്‍കുന്ന തരത്തില്‍ ഓഫീസിലേക്ക് കയറിപോകുന്ന ബിനുകുമാറിന്റെ സിസിടിവി ദൃശ്യങ്ങള്‍ ലഭിച്ചിട്ടുണ്ട്. ബിനുകുമാര്‍ ഓഫീസിലെത്തി വൈഷ്ണയെ തീകൊളുത്തി കൊലപ്പെടുത്തിയതാണെന്നാണ് പ്രാഥമിക നിഗമനം. എന്നാല്‍ ഔദ്യോഗിക സ്ഥിരീകരണത്തിന് ഡിഎന്‍എ ഫലം കൂടി ലഭിക്കേണ്ടതുണ്ട്.
ബിനുകുമാറിന് വൈഷ്ണയുമായുള്ള വൈരാഗ്യമാണ് കൊലപാതകത്തിലേക്ക് നയിച്ചതെന്നാണ് പ്രാഥമിക നിഗമനം. ഇന്‍ഷുറന്‍സ് സ്ഥാപനത്തിലെത്തി ബിനുകുമാര്‍ പ്രശ്‌നങ്ങളുണ്ടാക്കിയിരുന്നതായി വൈഷ്ണ നേരത്തെ പരാതി നല്‍കിയിരുന്നു. പൊള്ളലേറ്റ് മരിച്ചത് വൈഷ്ണയാണെന്ന് തിരിച്ചറിഞ്ഞതിന് പിന്നാലെ പൊലീസ് ബിനുകുമാറിനെ ബന്ധപ്പെടാന്‍ ശ്രമിച്ചിരുന്നു.
എന്നാല്‍ ഇയാളെ കുറിച്ചുള്ള വിവരങ്ങളൊന്നും ലഭിച്ചിരുന്നില്ല. കഴിഞ്ഞ ദിവസം അപകടം നടന്നതിന് പിന്നാലെ ഓഫീസിനുള്ളില്‍ നിന്ന് ബഹളം കേട്ടതായി നാട്ടുകാര്‍ അറിയിച്ചിരുന്നു. ഓഫീസ് മുറിക്കുള്ളില്‍ നിന്ന് തീ ആളിപ്പടരുന്നത് ശ്രദ്ധയില്‍പ്പെട്ട നാട്ടുകാര്‍ വെള്ളം ഒഴിച്ച് തീകെടുത്തുകയായിരുന്നു. തുടര്‍ന്ന് പൊലീസും ഫയര്‍ ആന്റ് റെസ്‌ക്യുവും സ്ഥലത്തെത്തിയാണ് മൃതദേഹങ്ങള്‍ ആശുപത്രിയിലേക്ക് മാറ്റിയത്.