നടൻ കൃഷ്ണകുമാറിന്റെ മകള് ദിയ കൃഷ്ണകുമാറിന്റെ സ്ഥാപനത്തിലെ സാമ്പത്തിക ക്രമക്കേടില് ജീവനക്കാരുടെ മുന്കൂര് ജാമ്യാപേക്ഷ കോടതി തള്ളി കോടതി. തിരുവനന്തപുരം പ്രിന്സിപ്പല് സെഷന്സ് കോടതിയാണ് ഇവരുടെ ജാമ്യാപേക്ഷ തള്ളിയത്. ജീവനക്കാരായിരുന്ന വിനീത,ദിവ്യ,രാധാകുമാരി എന്നിവരുടെ മുന്കൂര് ജാമ്യാപേക്ഷയാണ് തള്ളിയത്.
69 ലക്ഷം രൂപയുടെ തട്ടിപ്പ് നടന്നുവെന്നായിരുന്നു കൃഷ്ണകുമാറിന്റെ പരാതി. കേസുമായി ബന്ധപ്പെട്ട അന്വേഷണത്തിന് പിന്നാലെ സാമ്പത്തിക ക്രമക്കേട് നടന്നതിന് തെളിവുണ്ടെന്ന് ക്രൈം ബ്രാഞ്ച് കോടതിയില് റിപ്പോര്ട്ട് നല്കിയിരുന്നു. ഈ റിപ്പോര്ട്ട് ശരിവെച്ചാണ് കോടതി മുന്കൂര് ജാമ്യം തള്ളിയത്.
അതേസമയം കേസിലെ പ്രതികളായ മൂന്നു ജീവനക്കാരും അന്വേഷണവുമായി സഹകരിക്കുന്നില്ലെന്നും ക്രൈം ബ്രാഞ്ച് കോടതിയെ അറിയിച്ചിരുന്നു. പ്രതികളെ അറസ്റ്റ് ചെയ്യുന്ന നടപടിയിലേക്ക് അന്വേഷണ സംഘം ഉടന് കടക്കും. അതേസമയം കൃഷ്ണകുമാറും ദിയയും ജീവനക്കാരെ തട്ടിക്കൊണ്ടു പോകാന് ശ്രമിച്ചുവെന്ന കേസ് നിലനില്ക്കുന്നതല്ലെന്ന് പ്രോസിക്യൂഷന് കോടതിയെ അറിയിച്ചിരുന്നു.