മലപ്പുറത്ത് സ്വര്ണ്ണക്കടത്ത് സംഘത്തിന് വിവരങ്ങള് ചോര്ത്തി നല്കിയ എസ്ഐക്ക് സസ്പെന്ഷന്. പെരുമ്പടപ്പ് പൊലീസ് സ്റ്റേഷനിലെ എസ്ഐ എന് ശ്രീജിത്തിനെതിരെയാണ് നടപടി. തൃശൂര് റേഞ്ച് ഡിഐജിയാണ് ഇയാളെ സസ്പെന്റ് ചെയ്തത്. മലപ്പുറം എസ്പിയ്ക്ക് ആയിരുന്നു ഇത് സംബന്ധിച്ച അന്വേഷണ ചുമതല.
ശ്രീജിത്ത് നിരന്തരം സ്വര്ണ്ണക്കടക്കടത്ത് സംഘവുമായി ബന്ധം പുലര്ത്തിയിരുന്നതായി അന്വേഷണത്തില് കണ്ടെത്തി. സ്വര്ണ്ണക്കടത്ത് സംഘവുമായി ഇയാള്ക്ക് അടുത്ത ബന്ധമുണ്ടെന്ന വിവരത്തിന്റെ അടിസ്ഥാനത്തിലാണ് പൊലീസ് ആഭ്യന്തര അന്വേഷണം നടത്തിയത്. ശ്രീജിത്ത് നേരത്തെ ജോലി ചെയ്തിരുന്ന സ്റ്റേഷനുകളിലും സമാന ആരോപണം നേരിട്ടിരുന്നു.
സ്വര്ണ്ണക്കടത്ത് സംഘങ്ങളുമായി ശ്രീജിത്ത് സാമ്പത്തിക ഇടപാടുകള് നടത്തിയിരുന്നതായും അന്വേഷണത്തില് കണ്ടെത്തിയിട്ടുണ്ട്. ഇയാള് സ്വര്ണ്ണക്കടത്ത് സംഘങ്ങള്ക്ക് പൊലീസ് വാഹന പരിശോധന റൂട്ടിന്റെ വിവരങ്ങള് ഉള്പ്പെടെ കൈമാറിയിരുന്നു. ശ്രീജിത്തിന് സ്വര്ണ്ണക്കടത്ത് സംഘങ്ങളുമായുള്ള ബന്ധത്തെ കുറിച്ച് കസ്റ്റംസും അന്വേഷണം ആരംഭിച്ചിട്ടുണ്ട്.