അഡ്വക്കേറ്റ് സൈബി ജോസ് ഹാജരായ കേസില് പ്രതികളുടെ ജാമ്യ ഉത്തരവ് ഹൈക്കോടതി തിരിച്ച് വിളിച്ചു. മൂന്ന് ജഡ്ജിമാരുടെ പേരില് അഭിഭാഷകനായ സൈബി ജോസ് കൈക്കൂലി വാങ്ങിയ സംഭവത്തില് പൊലീസ് അന്വേഷണം നടക്കുന്നതിനിടയിലാണ് പത്തനംതിട്ട സ്വദേശി ബാബുവിന്റെ ഹര്ജിയില് ഹൈക്കോടതിയില് അസാധാരണ നടപടി.
ഇരയുടെ ഭാഗം കേള്ക്കാതെ പ്രതികള്ക്ക് ജാമ്യം നല്കിയതില് വീഴ്ച പറ്റിയെന്ന വിലയിരുത്തിയാണ് ജസ്റ്റിസ് സിയാദ് റഹ്മാന്റെ നടപടി. നോട്ടീസ് ലഭിച്ചിട്ടും ഇര ഹാജരായില്ല എന്നായിരുന്നു കോടതിയെ ധരിപ്പിച്ചത്. പട്ടികജാതി പട്ടികവര്ഗ്ഗ പീഡന നിരോധന നിയമപ്രകാരം റാന്നി പൊലീസ് എടുത്ത കേസില് പ്രതികളായ ബൈജു സെബാസ്റ്റ്യന്, ജിജോ വര്ഗീസ് എന്നീവര്ക്ക് ജാമ്യം നല്കിയത് ഇരയായ തന്റെ വാദം കേള്ക്കാതെ ആണെന്നായിരുന്നു പരാതി.
പ്രതികള്ക്ക് വേണ്ടി സൈബി ജോസ് കിടങ്ങൂര് ആയിരുന്നു അന്ന് ഹാജരായതെന്നും നോട്ടീസ് ലഭിക്കാത്തത് സംശയാസ്പദമാണെന്നും കോടതി അറിയിച്ചു. തുടര്ന്നാണ് ജസ്റ്റിസ് സിയാദ് റഹ്മാന് 2022 ഏപ്രില് 29 ല് താന് പുറപ്പെടുവിച്ച ഉത്തരവ് പുനഃപരിശോധിച്ചത്.
ഇരയുടെ വാദം കേള്ക്കാതെ പ്രതികള്ക്ക് ജാമ്യം നല്കിയത് സുപ്രീംകോടതിയുടെ മുന് ഉത്തരവുകളുടെ ലംഘനമാണെന്നും കോടതി വിലയിരുത്തി. ഒരു വര്ഷം മുന്പ് നല്കിയ ജാമ്യ ഹര്ജി വീണ്ടും കോടതിയുടെ പരിഗണനയ്ക്ക് കൊണ്ടുവരാനും ജസ്റ്റിസ് സിയാദ് റഹ്മാന് നിര്ദ്ദേശിച്ചു.