എറണാകുളം തൃക്കാക്കരയില് വീട് വാടകയ്ക്കെടുത്ത് ലഹരി വില്പ്പന. ലഹരി വില്പ്പന നടത്തിയിരുന്ന നാടക നടിയായ യുവതി പൊലീസ് പിടിയിലായി. കഴക്കൂട്ടം സ്വദേശിനി അഞ്ചുകൃഷ്ണയാണ് 56ഗ്രാം എംഡിഎംഎയുമായി പിടിയിലായത്.
യുവതിക്കൊപ്പം താമസിച്ചിരുന്ന കാസര്കോട് സ്വദേശി ഷമീര് പൊലീസിനെ കണ്ട് ഓടിരക്ഷപ്പെട്ടു. ഉണിച്ചിറ തോപ്പില് ജങ്ഷനിലെ കെട്ടിടത്തില് മൂന്നാം നിലയില് ദമ്പതികളെന്ന വ്യാജേനയാണ് പിടിയിലായ അഞ്ചുവും സുഹൃത്ത് ഷമീറും താമസിച്ചിരുന്നത്.
പതിവ് പരിശോനയ്ക്കായാണ് പൊലീസ് ജങ്ഷനില് എത്തിയത്. എന്നാല് പൊലീസിനെ കണ്ടതോടെ ഷമീര് മതിലും ചാടികടന്ന് ഓടി രക്ഷപ്പെട്ടു. ഇതോടെ സംശയം തോന്നിയ പൊലീസ് നടത്തിയ പരിശോധനയിലാണ് വീട്ടില് നിന്ന് എംഡിഎംഎ കണ്ടെടുത്തത്.
ബംഗ്ലൂരുവില് നിന്ന് വന്തോതില് എത്തിക്കുന്ന ലഹരിവസ്തുക്കള് എത്തിച്ച് വീട് വാടകയ്ക്കെടുത്ത് സൂക്ഷിച്ച ശേഷമായിരുന്നു വിതരണം.