സമൂഹമാധ്യമങ്ങളിൽ തന്റെപേരിൽ പ്രചരിക്കുന്ന വ്യാജസന്ദേശത്തിനെതിരെ പ്രശസ്ത കാൻസർ രോഗ വിദഗ്ധൻ, ഡോക്ടർ വി.പി.ഗംഗാധരൻ പൊലീസിൽ പരാതി നൽകി. കാൻസർ പ്രതിരോധത്തിനുള്ള നിർദേശങ്ങൾ എന്ന പേരിൽ വി.പി.ഗംഗാധരന്റെ ചിത്രംവെച്ച് വ്യാജ സന്ദേശം സൃഷ്ടിച്ചവർക്കെതിരെ നടപടി ആവശ്യപ്പെട്ടാണ് പരാതി.
ക്യാന്‍സറിന് കീമോതെറാപ്പിയേക്കാള്‍ നല്ലത് ചെറുനാരങ്ങയാണെന്നതടക്കമുള്ള വ്യജ പ്രചാരണങ്ങള്‍ ഡോ. ഗംഗാധരന്റെ പേരില്‍ പ്രചരിക്കുന്നതിനെതിരെയാണ് പരാതി. ഫേസ്ബുക്ക്, വാട്‌സ്ആപ് അടക്കമുള്ള സോഷ്യല്‍ മീഡിയയിലൂടെയാണ് സന്ദേശം പ്രചരിക്കുന്നത്.
കാൻസറിനെ പ്രതിരോധിക്കാനുള്ള മൂന്ന് മാർഗങ്ങളാണ് സന്ദേശത്തിന്റെ ഉള്ളടക്കം. വ്യാജപ്രചാരണം സുഹൃത്തുക്കള്‍ ശ്രദ്ധയിൽപ്പെടുത്തിയതിനെ തുടർന്നാണ് ഡോക്ടർ പൊലിസിൽ പരാതി നൽകിയത്.
ഇത്തരം വ്യാജ സന്ദേശങ്ങളിൽ ആരും വീണുപോകരുതെന്നും ഡോ.വി.പി.ഗംഗാധരൻ മുന്നറിയിപ്പ് നൽകുന്നു. ഡോ.വി.പി.ഗംഗാധരന്റെ പരാതിയിൽ കൊച്ചി സിറ്റി പൊലീസ് കേസ് റജിസ്റ്റർ ചെയ്ത് അന്വേഷണം ആരംഭിച്ചു.