സിപിഐഎമ്മിനെതിരെ ഇരട്ടവോട്ട് ആരോപണവുമായി ഉടുമ്പന്ചോലയിലെ എന്ഡിഎ സ്ഥാനാര്ത്ഥി സന്തോഷ് മാധവന്. തമിഴ്നാട്ടില് നിന്ന് 9000ലധികം ആളുകളെ സിപിഐഎം കേരളത്തില് എത്തിച്ചെന്നാണ് സന്തോഷിൻറെ ആരോപണം. എന്നാൽ എന്ഡിഎ ഇരട്ടവോട്ട് ആരോപണം പരാജയഭീതി മൂലമാണെന്ന് സിപിഐഎം ഇടുക്കി ജില്ലാ സെക്രട്ടേറിയറ്റ് അംഗം പി എന് വിജയന് പ്രതികരിച്ചു.
കാട്ടുപാത വഴിയാണ് ആളുകളെ കേരളത്തിലെത്തിച്ചതെന്ന് സന്തോഷ് മാധവന് പറഞ്ഞു. ഇതിന് ചില പൊലീസുകാരും കൂട്ടുനില്ക്കുകയാണ്. ഇരട്ടവോട്ട് തടഞ്ഞ ബിജെപി പ്രവര്ത്തകരെ സിപിഐഎം നേതാവ് പൊലീസ് സ്റ്റേഷനില് വച്ച് ഭീഷണിപ്പെടുത്തിയെന്നും സന്തോഷ് മാധവന് ആരോപിച്ചു.
തമിഴ്നാട്ടില് പോകുന്ന തോട്ടംതൊഴിലാളികളെ ബിജെപിയും കോണ്ഗ്രസും ആക്രമിക്കുന്നുവെന്നാണ് സി.പി.എമ്മിൻറെ ആരോപണം. ജനങ്ങളെ തടയാന് ഇവര്ക്ക് എന്ത് അവകാശം. അതിനെ സിപിഐഎം ചോദ്യം ചെയ്യും. ഇരട്ടവോട്ട് ഉണ്ടെങ്കില് പരിശോധിക്കേണ്ടത് തിരഞ്ഞെടുപ്പ് കമ്മീഷനെന്നും പി എന് വിജയന് പറഞ്ഞു.
ഇതിനിടെ നെടുങ്കണ്ടത്ത് ഇരട്ടവോട്ട് ചെയ്യാനെത്തിയവരെന്ന് ആരോപിച്ച് ഒരു സംഘം ആളുകളെ കോണ്ഗ്രസ് ബിജെപി പ്രവര്ത്തകര് തടഞ്ഞുവച്ചു. തമിഴ്നാട്ടില് വോട്ട് രേഖപ്പെടുത്തിയ ശേഷം സമാന്തര പാതയിലൂടെ കേരളത്തിലെത്തിയെന്ന് ആരോപിച്ചാണ് സംഘത്തെ തടഞ്ഞുവച്ചിരിക്കുന്നത്. വോട്ട് രേഖപ്പെടുത്തിയ മഷി മായ്ക്കുന്നതിനിടെയാണ് ഇവരെ പിടികൂടിയതെന്നാണ് നാട്ടുകാര് പറയുന്നത്. സംഭവത്തില് 14 പേരെ നെടുങ്കണ്ടം പൊലീസ് കസ്റ്റഡിയിലെടുത്തു.