റാപ്പർ വേടനെതിരായ കെ.പി ശശികലയുടെ പരാമർശത്തിൽ പ്രതികരണവുമായി പി ജയരാജൻ. വർഗീയ വിഷപ്പാമ്പുകളുടെ വായിൽ നിന്ന് കൂടുതലൊന്നും പ്രതീക്ഷിക്കേണ്ടെന്ന് പി ജയരാജൻ പറഞ്ഞു. ശശികലക്കെതിരെ പൊലീസ് കേസെടുക്കുമെന്നാണ് പ്രതീക്ഷയെന്നും പി ജയരാജൻ പറഞ്ഞു. ഇക്കഴിഞ്ഞ ദിവസമായിരുന്നു റാപ്പര് വേടനെതിരെ ഹിന്ദു ഐക്യവേദി മുഖ്യരക്ഷാധികാരി കെ പി ശശികല അധിക്ഷേപപരാമര്ശവുമായി രംഗത്തെത്തിയത്.
വേടനെതിരായത് ജാതീയമായ അധിക്ഷേപമാണെന്നും സംഘപരിവാർ ആവശ്യത്തിന് പട്ടികജാതിക്കാരെ ഉപയോഗിച്ച് വലിച്ചെറിയുന്നുവെന്നും പി ജയരാജൻ കുറ്റപ്പെടുത്തി. അതേസമയം റാപ്പ് സംഗീതത്തിന് എസ്.സി-എസ്.ടി വിഭാഗവുമായി പുലബന്ധമില്ലെന്നും വേടന്മാരുടെ തുണിയില്ല ചട്ടങ്ങൾക്ക് മുമ്പിൽ സമാജം അപമാനിക്കപ്പെടുന്നുവെന്നും കെ പി ശശികല പറഞ്ഞിരുന്നു. വേടന് മുമ്പിൽ ആടികളിക്കട കുഞ്ഞുരാമ എന്ന് പറഞ്ഞു നടക്കുന്ന സംവിധാനങ്ങൾ അവസാനിപ്പിക്കാൻ സമയമായി എന്നും ഭരണകൂടത്തിന് മുമ്പിൽ അപേക്ഷികയല്ല ആജ്ഞാപിക്കുകയാണ് എന്നും കെ പി ശശികല പറഞ്ഞു.
അതേസമയം വേടനെതിരായ ശശികലയുടെ അധിക്ഷേപ പരാമർശത്തിൽ ഡിവൈഎഫ്ഐ പരാതി നല്കിയിരുന്നു . പാലക്കാട് ജില്ലാ കമ്മിറ്റിയാണ് പരാതി നല്കിയത്. വേടനെ ജാതീയമായി അധിക്ഷേപിച്ച് സമൂഹത്തില് ഭിന്നിപ്പുണ്ടാക്കാന് ശ്രമമെന്നാണ് പരാതി. കഷ്ടപ്പാടുകള് നിറഞ്ഞ ബാല്യ കൗമാരങ്ങളോട് പടവെട്ടി സ്വയം ഉയര്ന്നുവന്ന കലാകാരനാണ് വേടന് എന്നറിയപ്പെടുന്ന ഹിരണ്ദാസ് മുരളിയെന്ന് ഡിവൈഎഫ്ഐ പരാതിയില് പറയുന്നു.