ആഗോള അയ്യപ്പ സംഗമത്തിലെ വരവ് ചെലവ് കണക്കിലെ ക്രമക്കേടില് കണക്കുകള് വ്യക്തമാക്കേണ്ടത് തിരുവിതാംകൂര് ദേവസ്വം ബോര്ഡാണെന്ന് ആവര്ത്തിച്ച് ദേവസ്വം മന്ത്രി വിഎന് വാസവന്. ദേവസ്വം ബോര്ഡ് എല്ലാം പറയുമെന്നും സര്ക്കാരിന് വരവ് ചെലവ് സംബന്ധിച്ച കണക്ക് പറയാന് അധികാരമില്ലെന്നുമാണ് ദേവസ്വം മന്ത്രി വിഎന് വാസവന്റെ നിലപാട്. തിരുവഞ്ചൂര് രാധാകൃഷ്ണന് നിയമസഭയില് ചോദിച്ച ചോദ്യത്തിന് കൊടുത്ത മറുപടി കൃത്യമാണെന്നും ദേവസ്വം ബോര്ഡ് അഡ്വാന്സ് കൊടുത്ത പണം തിരികെ കൊടുത്തിട്ടുണ്ടെന്നും വിഎന് വാസവന് പറഞ്ഞു.
കണക്കുകളില് വ്യക്തത വരുത്തണമെങ്കില് ദേവസ്വം ബോര്ഡിനോട് ചോദിക്കണം. കോടതിയാണ് ഇക്കാര്യങ്ങളില് ഇടപെടുകയും നിര്ദേശം കൊടുക്കുകയും ചെയ്തത്. ദേവസ്വം ബോര്ഡിനോട് ചോദിക്കേണ്ട സമയത്ത് ആവശ്യം എങ്കില് ചോദിക്കുമെന്നാണ് ദേവസ്വം മന്ത്രി പറയുന്നത്. അല്ലാതെ ബോര്ഡിനോട് കാര്യങ്ങള് ചോദിക്കാന് സര്ക്കാരിന് അധികാരമില്ലെന്നും വിഎന് വാസവന് ആവര്ത്തിച്ചു.
ശബരിമല സ്വര്ണക്കൊള്ളയമായി ബന്ധപ്പെട്ട് എസ്ഐടി അടൂര് പ്രകാശിനെ ചോദ്യം ചെയ്തതോടെ കോണ്ഗ്രസ് ഒന്നും മിണ്ടുന്നില്ലെന്നും വി എന് വാസവന് പരിഹസിച്ചു. കൊടിമരം മാറ്റി സ്ഥാപിച്ചതിലടക്കം അന്വേഷണം നടക്കട്ടെയെന്നും എല്ലാം കാണാമെന്നും അടൂര് പ്രകാശ്, ആന്റോ ആന്റണി എന്നിവര് ഉണ്ണികൃഷ്ണന് പോറ്റിയുമായി സോണിയ ഗാന്ധിയുടെ അടുത്ത എത്തിയതില് ഇപ്പോഴും മറുപടി പറയുന്നില്ലെന്നും വിഎന് വാസവന് ആരോപിച്ചു. അതിനിടയില് ആഗോള അയ്യപ്പ സംഗമത്തിലെ വരവ് ചെലവ് കണക്കിലെ ക്രമക്കേടില് ഹൈക്കോടതിയുടെ അന്വേഷണവും ദേവസ്വം മന്ത്രിയുടെ രാജിയും ആവശ്യപ്പെട്ട് പ്രതിപക്ഷം രംഗത്തെത്തി.
ഉത്തരവാദപ്പെട്ടവര് കണക്ക് ശരിയാക്കി കൊള്ളണമെന്നായിരുന്നു സിപിഎം സംസ്ഥാന സെക്രട്ടറി എംവി ഗോവിന്ദന് അയ്യപ്പ സംഗമത്തിലെ ക്രമക്കേടിനെ കുറിച്ചുള്ള ചോദ്യത്തിന് മറുപടി നല്കിയത്. ശബരിമല സ്വര്ണക്കൊള്ളയില് കടുത്ത പ്രതിരോധത്തിലായിതിനിടെയാണ് അയ്യപ്പ സംഗമത്തിലെ വരവു ചെലവു കണക്കുകളില് ക്രമക്കേടെന്ന് ഹൈക്കോടതി നിയോഗിച്ച സ്പെഷല് കമ്മീഷണറുടെ കണ്ടെത്തല്. ഇതോടെ ഇടതുപക്ഷം പ്രതിരോധത്തിലായി.