ശബരിമലയിലെ തിരക്കുമായി ബന്ധപ്പെട്ട പരാമര്‍ശത്തില്‍ മന്ത്രി സജി ചെറിയാനെതിരെ ഡിജിപിയ്ക്ക് പരാതി നല്‍കി കോണ്‍ഗ്രസ്. സജി ചെറിയാനെതിരെ കലാപാഹ്വാനത്തിന് കേസെടുക്കണമെന്ന് ആവശ്യപ്പെട്ട് കോട്ടയം ഡിസിസി പ്രസിഡന്റ് നാട്ടകം സുരേഷ് ആണ് പരാതി നല്‍കിയത്. പാമ്പാടിയിലെ നവകേരള സദസില്‍ മന്ത്രി നടത്തിയ വിവാദ പരാമര്‍ശത്തിലാണ് പരാതി.
മതസൗഹാര്‍ദ്ദം തകര്‍ക്കാനും കലാപം സൃഷ്ടിക്കാനുമാണ് മന്ത്രി പ്രസ്താവനയിലൂടെ ശ്രമിച്ചതെന്ന് പരാതിയില്‍ പറയുന്നു. ശബരിമല വിഷയം രാഷ്ട്രീയ പ്രേരിതമാണെന്ന് മുന്‍ ശബരിമല മേല്‍ശാന്തി പറഞ്ഞെന്നായിരുന്നു മന്ത്രിയുടെ പ്രസ്താവന. നവകേരള സദസ് കോട്ടയത്ത് എത്തിയപ്പോള്‍ സമീപത്തുള്ള ശബരിമലയില്‍ കൃത്രിമ തിരക്ക് സൃഷ്ടിച്ച് ശ്രദ്ധ തിരിക്കാന്‍ ശ്രമം നടന്നതായും ഇത് അന്വേഷിക്കുമെന്നുമാണ് സജി ചെറിയാന്‍ പറഞ്ഞത്.
ശബരിമലയില്‍ തീര്‍ത്ഥാടകര്‍ നേരിടുന്ന പ്രശ്‌നങ്ങളില്‍ ഹൈക്കോടതിയുടെ ഇടപെടല്‍ ആവശ്യപ്പെട്ട് മുന്നൂറ് പരാതികള്‍ ലഭിച്ചതായി ദേവസ്വം ബഞ്ച് അറിയിച്ചിരുന്നു. തീര്‍ത്ഥാടകര്‍ക്ക് കോടതി നിര്‍ദ്ദേശ പ്രകാരമുള്ള സൗകര്യങ്ങള്‍ ഏര്‍പ്പെടുത്തണമെന്ന് സര്‍ക്കാരിന് ബഞ്ച് നിര്‍ദ്ദേശം നല്‍കിയിരുന്നു.