സിപിഐ ഇടുക്കി ജില്ലാ സെക്രട്ടറി കെ. കെ ശിവരാമന് കാരണംകാണിക്കല് നോട്ടീസ്. ഫെയ്സ്ബുക്ക് കുറിപ്പിലൂടെ പാര്ട്ടി മുഖപത്രമായ ജനയുഗത്തെ വിമര്ശിച്ചതിന് പാര്ട്ടി നേതൃത്വമാണ് നോട്ടീസ് നല്കിയത്.
ജനയുഗം ശ്രീനാരായണഗുരു ജയന്തി കൈകാര്യം ചെയ്ത രീതിയെ കെ. കെ ശിവരാമന് വിമര്ശിച്ചിരുന്നു. ഇതുമായി ബന്ധപ്പെട്ടാണ് പാര്ട്ടി കാരണം കാണിക്കല് നോട്ടീസ് നല്കിയത്. ശിവരാമന്റെ മറുപടി സിപിഐ സംസ്ഥാന നിര്വാഹക സമിതി ചര്ച്ച ചെയ്യും.
ശ്രീനാരായണ ഗുരുജയന്തിയുമായി ബന്ധപ്പെട്ട് പാര്ട്ടി മുഖപത്രമായ ജനയുഗത്തിന്റെ ഒന്നാം പേജിൽ ഒരു ചെറിയ ചിത്രം മാത്രമാണ് നല്കിയതെന്നായിരുന്നു ശിവരാമന്റെ വിമര്ശനം.
കെ. കെ ശിവരാമന്റെ ഫെയ്സ്ബുക്ക് കുറിപ്പ്:
ഇന്ന് ശ്രീ നാരായണഗുരു ജയന്തി.
രണ്ടു പത്രങ്ങളൊഴികെ മറ്റെല്ലാ മലയാള ദിനപത്രങ്ങളും അവരുടെതായ കാഴ്ച്ചപ്പാടിൽ ഗുരു ദർശനങ്ങളെ അവതരിപ്പിച്ചു ലേഖനങ്ങൾ എഴുതി ജനയുഗം ഒന്നാം പേജിൽ ഒരു ചെറിയ ചിത്രം കൊടുത്തു. ദീപിക അകംപേജിലും ഒരു ചെറിയ ചിത്രം കൊടുത്തു. ജനയുഗത്തിന്റെത് ഗുരു നിന്ദയായിരുന്നു . ഗുരുവിനെ അറിയാത്ത ഒരു എഡിറ്റോറിയൽ ബോർഡും , മാനേജ്മെന്റം ജനയുഗത്തിനു ഭൂഷണമല്ല.