അട്ടപ്പാടിയിൽ ആദിവാസ് യുവാവ് മധുവിനെ ആൾകൂട്ട വിചാരണ നടത്തി മർദ്ദിച്ച് കൊന്ന കേസിലെ പ്രതി സി.പി.ഐ.എം ബ്രാഞ്ച് സെക്രട്ടറി. കേസിലെ മൂന്നാം പ്രതിയായ ഷംസുദ്ദീനെയാണ് മുക്കാലി ബ്രാഞ്ച് കമ്മിറ്റി സെക്രട്ടറിയായി തിരഞ്ഞെടുത്തത്.
23-ാം പാർട്ടി കോൺഗ്രസിന്റെ ഭാഗമായി നടക്കുന്ന ബ്രാഞ്ച് സമ്മേളനത്തിൽ ഷംസുദ്ദീനെ സെക്രട്ടറിയായി തിരഞ്ഞെടുക്കുകയായിരുന്നു. സംഭവം വിവാദമായതോടെ സെക്രട്ടറി സ്ഥാനത്തു നിന്നും ഷംസുദ്ദീനെ മാറ്റാൻ അട്ടപ്പാടി ഏരിയാ കമ്മിറ്റി ആവശ്യപ്പെട്ടിട്ടുണ്ട്.
ബ്രാഞ്ച് കമ്മിറ്റി യോഗം ഇന്ന് തന്നെ ചേർന്ന് സെക്രട്ടറിയെ മാറ്റണമെന്ന് ഏരിയാ സെക്രട്ടറി കമ്മിറ്റിക്ക് നിർദ്ദേശം നൽകി. ഷംസുദ്ദീനെ ബ്രാഞ്ച് സെക്രട്ടറിയാക്കരുതെന്ന് ഏരിയാ നേതൃത്വം നിർദേശിച്ചെങ്കിലും ഇതു മറികടന്നാണ് പ്രാദേശിക നേതൃത്വം ഷംസുദ്ദീനെ ബ്രാഞ്ച് സെക്രട്ടറിയാക്കിയത്.
2018 ഫെബ്രുവരി 22-നാണ് മാനസിക അസ്വാസ്ഥ്യമുള്ള അട്ടപ്പാടിയിലെ ആദിവാസി യുവാവ് മധുവിനെ മോഷണക്കുറ്റം ആരോപിച്ച് കെട്ടിയിട്ട് ആൾക്കൂട്ടം ക്രൂരമായി മർദ്ദിച്ചത്. പൊലീസെത്തി ആശുപത്രിയിലേക്ക് കൊണ്ടുപോകുന്ന വഴിക്ക് മധു മരിക്കുകയായിരുന്നു. മധുവിനെ മർദ്ദിക്കുന്നതിൻ്റെ ദൃശ്യങ്ങൾ സമൂഹ മാധ്യമങ്ങളിലൂടെ പ്രചരിച്ചതോടെ വൻ പ്രതിഷേധമാണ് ഉയർന്നത്.