കോൺഗ്രസിലുള്ളത് കാലഹരണപ്പെട്ട നേതാക്കളാണെന്ന് വിമർശിച്ച് എ.കെ ആന്റണിയുടെ മകനും പത്തനംതിട്ടയിലെ എൻഡിഎ സ്ഥാനാർഥിയുമായ അനിൽ ആൻ്റണി. എ.കെ ആന്റണിയെ കാണുമ്പോൾ സഹതാപം മാത്രമാണ് തോന്നുന്നത്. രാഷ്ട്രവിരുദ്ധമായി പ്രവർത്തിക്കുന്ന ഗാന്ധി കുടുംബത്തിന് വേണ്ടിയാണ് എ.കെ ആന്റണി സംസാരിക്കുന്നതെന്നും അനിൽ ആന്റണി കുറ്റപ്പെടുത്തി.
പാക്കിസ്ഥാനെ വെള്ളം പൂശാൻ ശ്രമിച്ച ഒരു എംപിക്ക് വേണ്ടി എ.കെ ആന്റണി സംസാരിച്ചപ്പോൾ തനിക്കു വിഷമമാണ് തോന്നിയതെന്ന് അനിൽ ആന്റണി പറഞ്ഞു. അദ്ദേഹം പഴയ പ്രതിരോധ മന്ത്രിയാണ്. കോൺഗ്രസ് പഴയ കോൺഗ്രസല്ല. കാലഹരണപ്പെട്ട നേതാക്കളാണ് കോൺഗ്രസിലുള്ളത്. കോൺഗ്രസ് ഒരു കുടുംബത്തിനു വേണ്ടി മാത്രമാണ് പ്രവർത്തിക്കുന്നതെന്നും അനിൽ ആന്റണി ആരോപിച്ചു.
ഇന്ത്യയെ നല്ല രീതിയിൽ മുന്നോട്ടുകൊണ്ടുപോകാൻ നരേന്ദ്ര മോദി നയിക്കുന്ന ബിജെപിക്കു മാത്രമേ സാധിക്കുകയുള്ളൂ. ജൂൺ നാലിനു നരേന്ദ്രമോദി വീണ്ടും പ്രധാനമന്ത്രിയാകും. ഇതു കണ്ട് ചന്ദ്രനെ നോക്കി കുരയ്ക്കുന്ന പട്ടികളെ പോലെ കാലഹരണപ്പെട്ട കോൺഗ്രസ് നേതാക്കൾ കുരച്ച് കൊണ്ടേയിരിക്കുംമെന്നും അനിൽ ആന്റണി പറഞ്ഞു.
അതേസമയം ഈ തിരഞ്ഞെടുപ്പിലും കോൺഗ്രസിന് പ്രതിപക്ഷ സ്ഥാനം പോലും ലഭിക്കില്ലെന്നും അനിൽ ആൻ്റണി കൂട്ടിച്ചേർത്തു. പത്തനംതിട്ടയിൽ ആരൊക്കെ വന്നാലും ഒന്നും നടക്കില്ല. പത്തനംതിട്ടയിൽ മകൻ അനിൽ ആന്റണി തോൽക്കണമെന്നും ആന്റോ ആന്റണി ജയിക്കണമെന്നും ആവശ്യപ്പെട്ട് നേരത്തെ എ.കെ ആന്റണി രംഗത്തെത്തിയിരുന്നു.