സംസ്ഥാനത്തെ നിയമസഭ തിരഞ്ഞെടുപ്പിന് ഒരുക്കമായി ചർച്ചകൾ സജീവമാക്കി കോൺഗ്രസ്. സ്ഥാനാര്ത്ഥി നിര്ണ്ണയത്തിലേക്ക് കടക്കാന് ഒരുങ്ങുകയാണ് കോൺഗ്രസ്. അടുത്ത ചൊവ്വ, ബുധന് ദിവസങ്ങളിലായി എഐസിസി സ്ക്രീനിങ് കമ്മിറ്റി ചെയര്മാന് മധുസൂദന് മിസ്ത്രി കേരളത്തില് ചര്ച്ചകള് നടത്തും. ഫെബ്രുവരി പകുതിയോടെ മുഴുവന് സ്ഥാനാര്ത്ഥികളേയും പ്രഖ്യാപിക്കാനാണ് നീക്കം.
രാഷ്ട്രീയ സാഹചര്യം വിലയിരുത്താന് എഐസിസി നിരീക്ഷകരും ഉടന് കേരളത്തിലെത്തും. കനഗോലുവിന്റെ റിപ്പോര്ട്ടും സ്ഥാനാര്ത്ഥി നിര്ണ്ണയത്തില് മാനദണ്ഡമാക്കും. സ്ഥാനാര്ത്ഥി നിര്ണ്ണയം യുദ്ധകാലാടിസ്ഥാനത്തില് പൂര്ത്തിയാക്കി വേഗത്തില് പ്രചാരണത്തിലേക്ക് കടക്കാനാണ് ഹൈക്കമാന്ഡ് നിര്ദേശം. ആദ്യ പടിയായി മധുസൂദന് മിസ്ത്രി ചെയര്മാനായ നാലംഗ സ്ക്രീനിങ് കമ്മിറ്റി നടപടികള് തുടങ്ങുകയാണ്.
ചൊവ്വ, ബുധന് ദിവസങ്ങളിലായി തിരുവനന്തപുരത്ത് മിസ്ത്രി നേതാക്കളെ കാണും. സിറ്റിങ് സീറ്റുകളിലും തര്ക്കമില്ലാത്ത ഇടങ്ങളിലും ആദ്യം സ്ഥാനാര്ത്ഥികളെ നിശ്ചയിക്കും. ആദ്യ പട്ടിക ജനുവരി അവസാനത്തോടെ പുറത്തു വിടാനാണ് ആലോചന. യുവത്വവും അനുഭവസമ്പത്തുമായിരിക്കും മാനദണ്ഡങ്ങളെന്ന് എഐസിസി വ്യക്തമാക്കി കഴിഞ്ഞു. സ്ക്രീനിങ് കമ്മിറ്റിക്ക് മൂന്ന് സിറ്റിങ്ങെങ്കിലും നടത്തേണ്ടി വരും. കമ്മിറ്റിയിലുള്ളത് ദേശീയ നേതാക്കളായതിനാല് ഡൽഹി ഇടപെടല് കാര്യമായി പ്രതീക്ഷിക്കാം.