കോഴിക്കോട് കാക്കൂരില്‍ വാഹനങ്ങള്‍ തടഞ്ഞ് പണപ്പിരിവ് നടത്തിയ സംഘം തടയാനെത്തിയ പൊലീസ് ഉദ്യോഗസ്ഥരെയും ആക്രമിച്ചു. കഴിഞ്ഞ ദിവസം രാത്രി കാക്കൂര്‍ ചേളന്നൂരിലാണ് അക്രമ സംഭവങ്ങള്‍ അരങ്ങേറിയത്. അക്രമിസംഘത്തിന്റെ ആക്രമണത്തില്‍ കാക്കൂര്‍ എസ്‌ഐ അബ്ദുള്‍ സലാം ഉള്‍പ്പെടെയുള്ള ഉദ്യോഗസ്ഥര്‍ക്ക് പരിക്കേറ്റു.
പൊലീസ് ജീപ്പിന് നേരെയും സംഘം ആക്രമണം നടത്തി. സംഭവത്തില്‍ നാല് പേരെ പൊലീസ് അറസ്റ്റ് ചെയ്തിട്ടുണ്ട്. മദ്യ ലഹരിയിലായിരുന്ന ഒരു സംഘം യുവാക്കളാണ് രാത്രി റോഡില്‍ വാഹനങ്ങള്‍ തടഞ്ഞുനിറുത്തി പണപ്പിരിവ് നടത്തിയത്. പണം നല്‍കാന്‍ തയ്യാറാകാത്തവരെ സംഘം അസഭ്യം പറഞ്ഞു.
നാട്ടുകാര്‍ വിവരം അറിയിച്ചതിനെ തുടര്‍ന്ന് സ്ഥലത്തെത്തിയ പൊലീസ് സംഘത്തെ യുവാക്കള്‍ ആക്രമിക്കുകയായിരുന്നു. പൊലീസ് വാഹനത്തിന്റെ ചില്ലും വയര്‍ലെസ് സെറ്റിന്റെ ആന്റിനയും സംഘം തകര്‍ത്തു. ഒടുവില്‍ നാട്ടുകാരുടെ സഹായത്തോടെയാണ് പൊലീസ് പ്രതികളെ കീഴടക്കിയത്.
ചേളന്നൂര്‍ കണ്ണങ്കര സ്വദേശികളായ കെഎന്‍ സുബിന്‍, ഇഎം റിജീഷ്, വെസ്റ്റ് ഹില്‍ സ്വദേശി ഇകെ അജേഷ്, ഇരുവള്ളൂര്‍ സ്വദേശി കെഎം അതുല്‍ എന്നിവരാണ് പിടിയിലായത്. പ്രതികളുടെ ആക്രമണത്തില്‍ പരിക്കേറ്റ പൊലീസ് ഉദ്യോഗസ്ഥര്‍ ആശുപത്രിയില്‍ ചികിത്സയിലാണ്.