അടൂര് പ്രകാശിന്റെ പ്രസ്താവന യുഡിഎഫ് നിലപാടാണെന്നും പൊതുസമൂഹം അങ്ങനെ ചിന്തിക്കുന്നില്ലെന്നും മുഖ്യമന്ത്രി പിണറായി വിജയന്. നടി ആക്രമിക്കപ്പെട്ട കേസ് പ്രോസിക്യൂഷന് നന്നായി കൈകാര്യം ചെയ്തുവെന്നും നിയമപരമായ പരിശോധന നടത്തി തുടര് നടപടികള് സ്വീകരിക്കുമെന്നും മുഖ്യമന്ത്രി പിണറായി വിജയന് വ്യക്തമാക്കി. അതിജീവിതയ്ക്ക് എല്ലാ പിന്തുണയും സര്ക്കാര് നല്കിയെന്നും ഇനിയും അത് തുടരുമെന്നും മുഖ്യമന്ത്രി വ്യക്തമാക്കി.
അപ്പീല് സംബന്ധിച്ചും യുഡിഎഫ് കണ്വീനര് വിചിത്രമായ മറുപടിയാണ് നല്കിയതെന്നും നാടിന്റെ പൊതു വികാരത്തിനു എതിരായ പ്രസ്താവനയാണെന്നും മുഖ്യമന്ത്രി പറഞ്ഞു. കണ്ണൂര് പ്രസ്സ് ക്ലബ് സംഘടിപ്പിക്കുന്ന മുഖാമുഖത്തില് സംസാരിക്കവെയാണ് മുഖ്യമന്ത്രി പിണറായി വിജയന് അടൂര് പ്രകാശിന്റെ നിലപാട് യുഡിഎഫ് നിലപാടാണെന്ന് വിമര്ശിച്ചത്.
ഗൂഢാലോചന സംബന്ധിച്ച് ദിലീപ് പറയുന്നത് അദ്ദേഹത്തിന്റെ തോന്നലുകളാണെന്നും പൊലീസ് തെളിവുകളുടെ അടിസ്ഥാനത്തിലാണ് മുന്നോട്ട് പോയതെന്നും മുഖ്യമന്ത്രി വിശദീകരിച്ചു. കോടതിയിലെ വാദങ്ങളെ കുറിച്ച് ഇപ്പോള് പറയാന് കഴിയില്ലെന്നും പിടി കുഞ്ഞുമുഹമ്മദിനെതിരായ ഇമെയില് സന്ദേശം കിട്ടിയ ഉടനെ കൈമാറിയിട്ടുണ്ടെന്നും അതില് കാല താമസം ഉണ്ടായിട്ടില്ലെന്നും മുഖ്യമന്ത്രി പ്രതികരിച്ചു.
നടിയെ ആക്രമിച്ച് അപകീര്ത്തികരമായ ദൃശ്യങ്ങള് പകര്ത്തിയെന്ന കേസില് നടന് ദിലീപ് അടക്കമുള്ളവരെ കുറ്റവിമുക്തരാക്കിയതില് സര്ക്കാര് അപ്പീല് പോവുന്നത് വേറെ ജോലിയില്ലാത്തത് കൊണ്ടാണെന്നാണ് രാവിലെ യുഡിഎഫ് കണ്വീനര് അടൂര് പ്രകാശ് പ്രതികരിച്ചത്. ഏത് കിട്ടിയാലും ഏതെങ്കിലും തരത്തില് ആരെയെങ്കിലും ഉപദ്രവിക്കാന് കഴിയും എന്ന് നോക്കിക്കാണുന്ന സര്ക്കാരാണ് ഇവിടെയുള്ളതെന്നും അടൂര് പ്രകാശ് പറഞ്ഞു. നടി എന്ന നിലയില് കുട്ടിയോട് ഒപ്പമാണ് ഞങ്ങള് എന്ന് പറയുമ്പോഴും ഒരു നീതി എല്ലാവര്ക്കും കിട്ടണം. ദിലീപിനെ സംബന്ധിച്ചിടത്തോളം നീതി ലഭ്യമായി എന്നുള്ളതാണ് എനിക്ക് വ്യക്തിപരമായി പറയാനുള്ളതെന്നും അടൂര് പ്രകാശ് പറഞ്ഞിരുന്നു. കലാകാരന് എന്നുമാത്രമല്ല, അദ്ദേഹവുമായി നേരിട്ട് ബന്ധമുണ്ടായിരുന്ന ഒരു വ്യക്തികൂടിയെന്ന നിലയ്ക്കാണ് ഇക്കാര്യം പറയുന്നതെന്നും അടൂര് പ്രകാശ് വ്യക്തമാക്കി.
കോണ്ഗ്രസ് എന്നാല് അടൂര് പ്രകാശിനെ തള്ളി രംഗത്ത് വന്നു. അടൂര് പ്രകാശിന്റെ പ്രതികരണത്തില് അതൃപ്തി പ്രകടിപ്പിച്ച് കോണ്ഗ്രസ് നേതാക്കള് രംഗത്തെത്തി. അടൂര് പ്രകാശിനെ തള്ളിക്കൊണ്ടാണ് കെപിസിസിയുടെ പ്രതികരണം. കോണ്ഗ്രസ് അതിജീവിതക്കൊപ്പമെന്ന് കെപിസിസി അധ്യക്ഷന് സണ്ണി ജോസഫ് പ്രതികരിച്ചു. സര്ക്കാര് അപ്പീല് പോകണമെന്നാണ് നിലപാടെന്നും സണ്ണി ജോസഫ് വ്യക്തമാക്കി. പ്രോസിക്യൂഷന് പരാജയപ്പെട്ടെന്നും ഗൂഢാലോചനക്ക് തെളിവ് നല്കാന് സാധിച്ചില്ലെന്നും സണ്ണി ജോസഫ് പറഞ്ഞു. അടൂര് പ്രകാശിന്റെ പ്രസ്താവന വ്യക്തിപരമായ പ്രസ്താവനയാണ്. കെപിസിസി ആ പ്രസ്താവന അംഗീകരിക്കുന്നില്ലെന്നും കോണ്ഗ്രസ് അതിജീവിതക്കൊപ്പമെന്നും സണ്ണി ജോസഫ് വ്യക്തമാക്കി.