ആലുവയില് മെട്രോയുടെ തൂണിലേക്ക് കാര് ഇടിച്ചുകയറി അച്ഛനും മകനുമടക്കം മൂന്നുപേര് മരിച്ചു. കോട്ടയം കുമാരനെല്ലൂര് സ്വദേശികളായ ടി.ടി. രാജേന്ദ്രപ്രസാദ്, ടി.ആര്. അരുണ് പ്രസാദ് , ചന്ദ്രന് നായര് എന്നിവരാണു മരിച്ചത്.
ആലുവ മുട്ടത്ത് ഇന്ന് പുലർച്ചെ മൂന്നിനായിരുന്നു അപകടമുണ്ടായത്. നെടുമ്പാശേരി വിമാനത്താവളത്തിൽ ബന്ധുവായ ചന്ദന്റെ മകനെ യാത്രയാക്കി മടങ്ങുമ്പോഴായിരുന്നു അപകടത്തിൽപ്പെട്ടത്. രാജേന്ദ്രപ്രസാദാണ് കാര് ഓടിച്ചിരുന്നത്. കൊച്ചി മെട്രോയുടെ തൂണിലിടിച്ച കാര് ഡിവൈഡറില് കയറി മറിയുകയായിരുന്നു.
രാജേന്ദ്ര പ്രസാദ് സംഭവസ്ഥലത്തും മറ്റു രണ്ടുപേര് ആശുപത്രിയിലുമാണ് മരിച്ചത്. മൃതദേഹങ്ങള് കൊച്ചി കിംസ് ആശുപത്രിയിലെത്തിച്ചു. എറണാകുളം മെഡിക്കല് കോളജില് പോസ്റ്റ്മോര്ട്ടത്തിനുശേഷം കോട്ടയത്തേക്കു കൊണ്ടുവരും. രാജേന്ദ്രപ്രസാദ് മലയാള മനോരമ ലൈബ്രറി ജീവനക്കാരനും അരുണ് പ്രസാദ് മനോരമ ഓണ്ലൈന് ജീവനക്കാരനുമാണ്.