സംസ്ഥാനത്തെ 49 തദ്ദേശവാര്ഡുകളില് നാളെ ഉപതിരഞ്ഞെടുപ്പ് നടത്തുന്നതിന് മുന്നൊരുക്കങ്ങള് പൂര്ത്തിയായതായി സംസ്ഥാന തിരഞ്ഞെടുപ്പ് കമ്മീഷണര് എ.ഷാജഹാന്. വോട്ടെടുപ്പ് രാവിലെ ഏഴ് മണി മുതല് വൈകുന്നേരം ആറ് മണി വരെയാണ്. സമ്മതിദായകര്ക്ക് വോട്ട് ചെയ്യുന്നതിന് തിരിച്ചറിയല് രേഖകളായി കേന്ദ്ര തിരഞ്ഞെടുപ്പ് കമ്മീഷന് നല്കിയിട്ടുള്ള തിരിച്ചറിയല് കാര്ഡ്, പാസ്പോര്ട്ട്, ഡ്രൈവിംഗ് ലൈസന്സ്, പാന്കാര്ഡ്, ആധാര്കാര്ഡ്, ഫോട്ടോ പതിച്ചുള്ള എസ്.എസ്.എല്.സി ബുക്ക്, ഏതെങ്കിലും ദേശസാല്ക്കൃത ബാങ്കില് നിന്നും തിരഞ്ഞെടുപ്പ് തീയതിക്ക് ആറ് മാസക്കാലയളവിന് മുന്പുവരെ നല്കിയിട്ടുള്ള ഫോട്ടോ പതിച്ച പാസ്ബുക്ക്, സംസ്ഥാന തിരഞ്ഞെടുപ്പ് കമ്മീഷന് നല്കിയിട്ടുള്ള തിരിച്ചറിയല് രേഖ എന്നിവ ഉപയോഗിക്കാം.
ഇപ്രാവശ്യം വോട്ടു ചെയ്യുന്നവരുടെ ഇടതു കൈയ്യിലെ ചൂണ്ടുവിരലിന് പകരം നടുവിരലിലാണ് മായാത്ത മഷി പുരട്ടുക. 2024 ഏപ്രിലില് നടന്ന ലോക്സഭാ തിരഞ്ഞെടുപ്പില് വോട്ട് ചെയ്തിട്ടുള്ള വോട്ടര്മാരുടെ ചൂണ്ടുവിരലില് പുരട്ടിയ മഷിയടയാളം പൂര്ണമായും മാഞ്ഞ് പോയിട്ടില്ലാത്തതു കൊണ്ടാണീ മാറ്റം.
വയനാട് ഒഴികെയുള്ള 13 ജില്ലകളിലെ ഒരു ജില്ലാ പഞ്ചായത്ത്, നാല് ബ്ലോക്ക് പഞ്ചായത്ത്, ആറ് മുനിസിപ്പാലിറ്റി, 38 ഗ്രാമപഞ്ചായത്ത് വാര്ഡുകളിലാണ് ഉപതിരഞ്ഞെടുപ്പ് നടക്കുന്നത്. ആകെ 169 സ്ഥാനാര്ത്ഥികളാണ് ജനവിധി തേടുന്നത്. അതില് 76 പേര് സ്ത്രീകളാണ്. വോട്ടെടുപ്പിന് 211 പോളിംഗ് ബൂത്തുകള് സജ്ജമാക്കിയിട്ടുണ്ട്.
പോളിംഗ് ഉദ്യോഗസ്ഥര്ക്കുള്ള പരിശീലനം പൂര്ത്തിയായി. ബാലറ്റ് പേപ്പറുകള് അച്ചടിച്ച് വരണാധികാരികള്ക്ക് കൈമാറി. വോട്ടിംഗ് മെഷീനുകളും സജ്ജമാക്കി കഴിഞ്ഞു. സംക്ഷിപ്ത പുതുക്കലിനെ തുടര്ന്ന് 2024 ജൂലൈ ഒന്നിന് പ്രസിദ്ധീകരിച്ച വോട്ടര്പട്ടിക അടിസ്ഥാനമാക്കിയാണ് ഉപതിരഞ്ഞെടുപ്പ് നടത്തുന്നത്. 49 വാര്ഡുകളിലെ അന്തിമവോട്ടര് പട്ടികയില് 163639 വോട്ടര്മാരാണുള്ളത്. 77409 പുരുഷന്മാരും 86228 സ്ത്രീകളും രണ്ട് ട്രാന്സ്ജന്ഡര്മാരും. വോട്ടര്പട്ടിക www.sec.kerala.gov.in എന്ന വെബ്സൈറ്റില് ലഭ്യമാണ്.
വോട്ടെടുപ്പ് ദിവസം രാവിലെ ആറ് മണിക്ക് മോക്ക് പോള് നടത്തും.
ക്രമസമാധാനപാലനത്തിനുള്ള നടപടികള് സ്വീകരിച്ചിട്ടുണ്ട്. പ്രശ്നബാധിത ബൂത്തുകളില് പ്രത്യേക പോലീസ് സുരക്ഷ ഏര്പ്പെടുത്തും. വോട്ടെണ്ണല് ജൂലൈ 31 ന് രാവിലെ 10 ന് വിവിധ കേന്ദ്രങ്ങളില് നടത്തും. വോട്ടെണ്ണല് ഫലം www.sec.kerala.gov.in സൈറ്റിലെ TREND ല് ലഭ്യമാകും.