വനിതാ ആക്ടിവിസ്റ്റും അദ്ധ്യാപികയുമായ ബിന്ദു അമ്മിണിയെ കോഴിക്കോട് ബീച്ചില് വെച്ച് ആക്രമിച്ച സംഭവത്തില് കുറ്റക്കാര്ക്കെതിരെ ശക്തമായ നടപടി ഉണ്ടാകുമെന്ന് ഉന്നത വിദ്യാഭ്യാസ വകുപ്പ് മന്ത്രി ആര് ബിന്ദു. ബിന്ദു അമ്മിണിയ്ക്കു നേരെ നടുറോഡില് കൈയേറ്റം നടത്തിയ തരം ക്രിമിനലിസത്തെ കേരളത്തില് വളരാന് അനുവദിക്കാനാവില്ലെന്ന് മന്ത്രി ഫെയ്സ്ബുക്ക് പോസ്റ്റില് വ്യക്തമാക്കി.
വിശ്വാസമോ അഭിപ്രായവ്യത്യാസമോ ഒന്നുമല്ല അക്രമത്തിനു പിന്നില്. പരപീഡാ വ്യഗ്രതയും ഇഷ്ടമില്ലാത്തതിനെ അവസാനിപ്പിക്കുമെന്ന ഫാസിസ്റ്റ് മനസ്സുമാണ്. ഒരു സ്ത്രീയോട് ഇങ്ങനെ ചെയ്തുകളയാം എന്നു തോന്നിയവനോട് ഒരു ദാക്ഷിണ്യവും സര്ക്കാര് കാട്ടില്ലെന്ന് മന്ത്രി വ്യക്തമാക്കി.
ഫെയ്സ്ബുക്ക് പോസ്റ്റ്:
ബിന്ദു അമ്മിണിയ്ക്കു നേരെ നടുറോഡില് കൈയേറ്റം നടത്തിയതരം ക്രിമിനലിസത്തെ കേരളത്തില് വളരാന് അനുവദിക്കാനാവില്ല.
വിശ്വാസമോ അഭിപ്രായവ്യത്യാസമോ ഒന്നുമല്ല അക്രമത്തിനു പിന്നില്; പരപീഡാ വ്യഗ്രതയും ഇഷ്ടമില്ലാത്തതിനെ അവസാനിപ്പിക്കുമെന്ന ഫാസിസ്റ്റ് മനസ്സുമാണ്.
അസഹിഷ്ണുതയുടെ തീയെരിയിച്ച് ഇത്തരം ക്രിമിനല് മനസ്സുകാര്ക്ക് പൊതുറോഡില് സമ്മാന്യത നല്കിയവര്ക്കും ഈ അക്രമത്തില് നേരിട്ട് ഉത്തരവാദിത്വമുണ്ട്.
ഒരു സ്ത്രീയോട് ഇങ്ങനെ ചെയ്തുകളയാം എന്നു തോന്നിയവനോട് ഒരു ദാക്ഷിണ്യവും സര്ക്കാര് കാട്ടില്ല, ശക്തമായ നടപടിയുണ്ടാവും.
കഴിഞ്ഞ ദിവമാണ് കോഴിക്കോട് നോര്ത്ത് ബീച്ചില് വെച്ച് ബിന്ദു അമ്മിണി ആക്രമണത്തിന് ഇരയായത്. ഇവരെ മര്ദ്ദിച്ചത് ബേപ്പൂര് സ്വദേശി മോഹന്ദാസ് ആണെന്ന് പൊലീസ് കണ്ടെത്തിയിട്ടുണ്ട്. മത്സ്യത്തൊഴിലാളിയായ ഇയാള് മദ്യലഹരിയിലായിരുന്നെന്നാണ് പൊലീസ് പറയുന്നത്. സംഘര്ഷത്തില് ഇയാള്ക്കും ചെറുതായി പരിക്കേറ്റിട്ടുണ്ട്.
വാഹനം നിര്ത്തുന്നതുമായി ബന്ധപ്പെട്ട തര്ക്കം കൈയാങ്കളിയില് കലാശിക്കുകയായിരുന്നെന്നാണ് പൊലീസ് പറയുന്നത്. ഐപിസി 323, 509 എന്നീ വകുപ്പുകള് പ്രകാരമാണ് കേസെടുത്തത്. അടിപിടി, സ്ത്രീകളെ അപമാനിക്കല് എന്നീ വകുപ്പുകള് ചുമത്തിയാണ് കേസ് എടുത്തതെന്ന് പൊലീസ് അറിയിച്ചു. മര്ദ്ദിക്കുന്നതിന്റെ വീഡിയോ ദൃശ്യങ്ങള് സ്വന്തം ഫെയ്സ്ബുക്ക് പേജില് ബിന്ദു അമ്മിണി തന്നെയാണ് പോസ്റ്റ് ചെയ്തത്.