വയനാട്ടില്‍ അഞ്ച് ലക്ഷം രൂപയുടെ സിന്തറ്റിക് ലഹരി മരുന്നുമായി ആയുര്‍വേദ ഡോക്ടര്‍ പിടിയില്‍. കൊല്ലം കരുനാഗപ്പള്ളി തൊടിയൂര്‍ സ്വദേശി അന്‍വര്‍ ഷാ ആണ് പിടിയിലായത്. 160.77 ഗ്രാം മെത്താഫിറ്റമിനുമായി മുത്തങ്ങ ചെക്ക്‌പോസ്റ്റിലാണ് യുവ ഡോക്ടര്‍ അറസ്റ്റിലായത്. മൈസൂര്‍ -പൊന്നാനി ബസില്‍ യാത്ര ചെയ്യുകയായിരുന്ന അന്‍വര്‍ ഷായെ എക്‌സൈസ് സംഘം പിടികൂടുകയായിരുന്നു.
അന്‍വര്‍ ഷാ ദുബായില്‍ സ്വന്തമായി ആയുര്‍വേദ സെന്റര്‍ നടത്തിവരുന്ന ഡോക്ടറാണ്. വിവാഹ ആവശ്യത്തിനായി നാട്ടിലെത്തിയ ഇയാള്‍ കഴിഞ്ഞ അഞ്ച് മാസമായി നാട്ടിലുണ്ടായിരുന്നു. ബംഗളൂരുവില്‍ നിന്ന് മയക്കുമരുന്ന് വാങ്ങി കൊച്ചിയിലെത്തിച്ച് ചില്ലറ വില്‍പ്പന നടത്താനായിരുന്നു പ്രതിയുടെ നീക്കമെന്ന് എക്‌സൈസ് അധികൃതര്‍ പറഞ്ഞു.
അന്താരാഷ്ട്ര വിപണിയില്‍ അഞ്ച് ലക്ഷം രൂപയോളം വിലമതിക്കുന്നതാണ് പിടിച്ചെടുത്ത ലഹരി മരുന്ന്. എക്‌സൈസ് ഇന്‍സ്‌പെക്ടര്‍ നിധിന്‍ കെവിയുടെ നേതൃത്വത്തില്‍ നടത്തിയ പരിശോധനയിലാണ് പ്രതി പിടിയിലായത്.
