ഇരുചക്ര വാഹനത്തെചൊല്ലിയുള്ള തര്ക്കത്തിനിടെ അനുജന് ചേട്ടനെ വെടിവെച്ചു കൊന്നു. ആലുവയില് ഇന്നു പുലര്ച്ചെ 12.30നാണ് സംഭവം. എടയപ്പുറം തൈപറമ്പില് പോള്സണ് ആണ് മരിച്ചത്. അനുജന് ടി ജെ തോമസിനെ പൊലീസ് കസ്റ്റഡിയിലെടുത്തു. വീട്ടിലെ ഇരുചക്ര വാഹനവുമായി ബന്ധപ്പെട്ട തര്ക്കവും തുടര്ന്ന് പൊലീസില് നല്കിയ പരാതിയുമാണ് വെടിവയ്പ്പില് കലാശിച്ചത്.
ഇരുവരും പിതാവിനൊപ്പം ഒരു വീട്ടിലാണ് താമസം. തോമസിന്റെ ബൈക്ക് രാവിലെ പോള്സന് അടിച്ചു തകര്ത്തിരുന്നു. ഇതിനെതിരെ തോമസ് പൊലീസില് പരാതി നല്കി. ഇതേചൊല്ലി ഉണ്ടായ വാക്കുതര്ക്കത്തിനിടെ എയര്ഗണ് ഉപയോഗിച്ച് തോമസ് പോള്സനെ വെടിവെക്കുകയായിരുന്നു. തോമസ് തന്നെയാണ് വിവരം പൊലീസിനെ അറിയിച്ചത്. തുടര്ന്ന് ആലുവ പൊലീസെത്തി ഇയാളെ അറസ്റ്റ് ചെയ്യുകയായിരുന്നു. മൃതദേഹം പോസ്റ്റ് മോര്ട്ടത്തിന് ശേഷം ബന്ധുക്കള്ക്ക് വിട്ടു നല്കും.