എല്ലാ വീട്ടിലും ഒരു ലാപ്ടോപ് നല്കുമെന്ന സംസ്ഥാന ബജറ്റിലെ തോമസ് ഐസകിന്റെ പ്രഖ്യാപനം തിരഞ്ഞെടുപ്പില് ജനങ്ങളെ കബളിപ്പിക്കുന്നതിനാണെന്ന് പ്രതിപക്ഷ നേതാവ് രമേശ് ചെന്നിത്തല. നൂറുദിന പരിപാടിയില് 5 ലക്ഷം ലാപ്ടോപ് നല്കുമെന്ന് പറഞ്ഞിരുന്നതാണ്. അത് നടക്കാതിരിക്കുമ്പോഴാണ് പുതിയ പ്രഖ്യാപനമെന്നും രമേശ് ചെന്നിത്തല ആരോപിച്ചു.
കഴിഞ്ഞ ബഡ്ജറ്റുകളില് നൂറുക്കണക്കിന് പൊള്ളയായ വാഗ്ദാനങ്ങള് നല്കി ജനങ്ങളെ കബളിപ്പിച്ച തോമസ് ഐസക് തെരഞ്ഞെടുപ്പ് വര്ഷം വാഗ്ദാനങ്ങള് വാരി വിതറി വീണ്ടും ജനങ്ങളെ വഞ്ചിക്കുകയാണ്. ഐസക്കിന്റേത് ബഡായി ബഡ്ജറ്റ് മാത്രമാണ്.
എല്.ഡി. എഫ് സര്ക്കാരിന്റെ പ്രകടന പത്രികയില് 25 ലക്ഷം പേര്ക്ക് തൊഴില് നല്കുമെന്നാണ് പ്രഖ്യാപിച്ചിരുന്നത്. അത് നടന്നില്ല. ഇപ്പോള് 5 വര്ഷം കൊണ്ട് ഡിജിറ്റല് മേഖലയില് മാത്രം 20 ലക്ഷം പേര്ക്ക് തൊഴില് നല്കുമെന്നാണ് പ്രഖ്യാപിച്ചിരിക്കുന്നത്. 5 വര്ഷം കൊണ്ട് പ്രൊഫഷണല് രംഗത്ത് 20 ലക്ഷം പേര്ക്ക് തൊഴില് നല്കുമെന്നും പ്രഖ്യാപിക്കുന്നു. ഇത് തട്ടിപ്പാണ്.
അടുത്ത നിയമസഭാ തിരഞ്ഞെടുപ്പില് പരാജയം ഉറപ്പായത് കൊണ്ടാണ് അപ്രായോഗികമായ ഇത്തരമൊരു ബജറ്റ് ഐസക് അവതരിപ്പിച്ചത്. നിയമസഭയുടെ മൂന്നേകാല് മണിക്കൂര് സമയം വെറുതെ പാഴാക്കിയിരിക്കുകയാണ് ധനമന്ത്രിയെന്നും രമേശ് ചെന്നിത്തല പറഞ്ഞു.