ആലത്തൂർ ഡിസിസിയുടെ ആരോപണങ്ങൾക്ക് കഴമ്പില്ലെന്ന് രമ്യ ഹരിദാസ്. വിഷയത്തിൽ വിവാദങ്ങൾക്കില്ലെന്നും പറയാനുളളത് പാർട്ടി വേദികളിൽ പറയുമെന്നും രമ്യ ഹരിദാസ് പറഞ്ഞു. ഡിസിസി പ്രസിഡൻ്റിൻ്റെ പരാമർശം ഏതു സാഹചര്യത്തിലാണെന്ന് അറിയില്ല. എല്ലാ നേതാക്കളുമായും നല്ല രീതിയിൽ സഹകരിച്ച് തന്നെയാണ് പ്രവർത്തിച്ചു പോകുന്നത്. തോൽവിയുടെ കാര്യം പാർട്ടി പരിശോധിക്കട്ടെയെന്നും രമ്യാ ഹരിദാസ് പറഞ്ഞു.
ആലത്തൂർ മണ്ഡലത്തിലെ പരാജയത്തിന് കാരണം സ്ഥാനാർത്ഥിയുടെ ഭാഗത്ത് നിന്നുണ്ടായ പിഴവുകളാണെന്ന് കാട്ടി ഡിസിസി പ്രസിഡൻ്റ് എ. തങ്കപ്പൻ നേരത്തെ രംഗത്തെത്തിയിരുന്നു. മുതിർന്ന നേതാക്കൾ അടക്കം നിർദേശിച്ച കാര്യങ്ങൾ സ്ഥാനാർഥി വേണ്ട രീതിയിൽ ശ്രദ്ധിച്ചില്ല. രമ്യയുടെ തോൽവിയിൽ നേതൃത്വത്തിന് പങ്കില്ലെന്നും ഡിസിസി പ്രസിഡൻ്റ് പറഞ്ഞിരുന്നു.
അതേസമയം എ.വി ഗോപിനാഥ് ഫാക്ടർ ആലത്തൂരിൽ പ്രവർത്തിച്ചിട്ടില്ലെന്നും എ. തങ്കപ്പൻ കുറ്റപ്പെടുത്തി. കുറഞ്ഞ വോട്ടുകളാണ് എൽഡിഎഫിന് കിട്ടിയതെന്നും എ. തങ്കപ്പൻ പറഞ്ഞു. അതേസമയം, തൻ്റെ നിലപാട് തോൽവിക്ക് കാരണമായെന്നായിരുന്നു എ.വി. ഗോപിനാഥിൻ്റെ പ്രതികരണം. ഈ സാഹചര്യത്തിലാണ് ഗോപിനാഥ് ഫാക്ടർ സ്വാധീനിച്ചിട്ടില്ലെന്ന ഡിസിസിയുടെ വിശദീകരണം.