ആലപ്പുഴ മെഡിക്കല്‍ കോളേജിലെ സൂപ്പര്‍ സ്‌പെഷ്യാലിറ്റി ബ്ലോക്ക് ഇന്ന് ഉദ്ഘാടന ചടങ്ങില്‍ നിന്ന് രമേശ് ചെന്നിത്തലയും കൊടിക്കുന്നില്‍ സുരേഷും പിന്മാറി. കെ.സി വേണുഗോപാലിനെയും ജി. സുധാകരനെയും ഉദ്ഘാടന പരിപാടിയില്‍നിന്ന് തഴഞ്ഞതില്‍ പ്രതിഷേധിച്ചാണ് ഇരുവരും പരിപാടി ബഹിഷ്‌കരിക്കുന്നത്.
മെഡിക്കല്‍ കോളേജിലെ സൂപ്പര്‍ സ്‌പെഷ്യാലിറ്റി ബ്ലോക്ക് മുഖ്യമന്ത്രി പിണറായി വിജയന്‍ ഇന്ന് ഉദ്ഘാടനം ചെയ്യാനിരിക്കെ വിവാദം മുറുകുകയാണ്. തന്നെ ക്ഷണിക്കാത്തതിനെതിരെ ഫെയ്‌സ്ബുക്ക് പോസ്റ്റുമായി മുന്‍ മന്ത്രി ജി. സുധാകരന്‍ ഇന്നലെ രംഗത്തെത്തിയിരുന്നു.
കെ സി വേണുഗോപാലിനെ ഒഴിവാക്കിയതില്‍ കോണ്‍ഗ്രസ് സമരം പ്രഖ്യാപിച്ചതിന് പിന്നാലെയാണ് ജി സുധാകരന്‍ പ്രതിഷേധം വ്യക്തമാക്കിയത്. നിര്‍മ്മാണത്തിനായി ആദ്യാവസാനം നിന്നവരെ ഒഴിവാക്കേണ്ടിയിരുന്നില്ലെന്ന് ജി. സുധാകരന്‍ ഫെയ്‌സ്ബുക്ക് കുറിപ്പില്‍ പറഞ്ഞു.
ഷൈലജ ടീച്ചറെയും ഉള്‍പ്പെടുത്താമായിരുന്നു. പുതിയ ബ്ലോക്കിനായി ആദ്യവസാനം മുന്നില്‍ നിന്നയാളാണ് താന്‍. തന്നെ ഓര്‍ക്കാതിരുന്നതില്‍ പരിഭവമില്ല. വഴിയരികിലെ ഫ്‌ളക്‌സുകളിലല്ല ജനഹൃദയങ്ങളിലെ ഫ്‌ളക്‌സുകളാണ് പ്രധാനം. ചരിത്ര നിരാസം ചില ഭാരവാഹികള്‍ക്ക് ഏറെ ഇഷ്ടപ്പെട്ട മാനസിക വ്യാപാരമാണെന്നും ജി. സുധാകരന്‍ കുറിപ്പില്‍ പറഞ്ഞു.
