കോണ്ഗ്രസിന്റെ തകര്ച്ചയുടെ സാക്ഷിയാണ് മുതിര്ന്ന കോണ്ഗ്രസ് നേതാവ് എ കെ ആന്റണിയെന്ന് സിപിഎം പോളിറ്റ് ബ്യൂറോ അംഗം എ വിജയരാഘവന്. പ്രശാന്ത് കിഷോറിന്റെ പാര്ട്ടി പ്രവേശനം സംബന്ധിച്ച് അടുത്തിടെ ഉണ്ടായ തര്ക്കങ്ങള് പോലും കോണ്ഗ്രസിന്റെ രാഷ്ട്രീയ തകര്ച്ചയുടെ ഉദാഹരണമാണെന്നും അദ്ദേഹം പറഞ്ഞു.
ബിജെപിയെ പ്രതിരോധിക്കാന് കോണ്ഗ്രസിന് കഴിയില്ല. ഇത്രയും വര്ഷം ഡല്ഹിയില് ആയിരുന്ന ആന്റണി കേരളത്തിലേക്ക് മടങ്ങുമ്പോള് കോണ്ഗ്രസ് എവിടെ എത്തി നില്ക്കുന്നുവെന്ന് പരിശോധിക്കണമെന്നും വിജയരാഘവന് കൂട്ടിച്ചേര്ത്തു.
ഗുജറാത്ത് മോഡല് പഠിക്കാനായി ചീഫ് സെക്രട്ടറിയടക്കമുള്ളവരുടെ സംഘം ഗുജറാത്ത് സന്ദര്ശനം നടത്തുന്ന വിഷയത്തില് രാഷ്ട്രീയം രാഷ്ട്രീയമായിത്തന്നെ തുടരും. ഇടതുപക്ഷ സര്ക്കാര് വ്യക്തമായ രാഷ്ട്രീയ നിലപാടുണ്ട്. അതില് വെള്ളം ചേര്ത്തിട്ടില്ലന്നും അദ്ദേഹം പ്രതികരിച്ചു. ബിജെപിക്കെതിരെ ശക്തമായ നിലപാടാണ് സിപിഎം സ്വീകരിക്കുന്നത്. ഇത്തരം നിലപാടുകളില്ലാത്ത പ്രതിപക്ഷമാണ് ആക്ഷേപം ഉന്നയിക്കുന്നതെന്നും അദ്ദേഹം പറഞ്ഞു.