ആദ്യരാത്രിക്ക് പിറ്റേന്ന് ഭാര്യയുടെ സ്വര്ണവും പണവുമായി മുങ്ങിയ യുവാവ് അറസ്റ്റില്. കായംകുളം തേക്കടത്ത് തറയില് അസ്ഹറുദീന് റഷീദ് (30) ആണ് അറസ്റ്റിലായത്. വധുവിന്റെ പിതാവിന്റെ പരാതിയില് ഇയാളെ അടൂര് പൊലീസ് ആദ്യഭാര്യയുടെ വീട്ടില് നിന്നും അറസ്റ്റ് ചെയ്തു.
ജനുവരി 30ന് ആദിക്കാട്ടുകുളങ്ങര എസ്എച്ച് ഓഡിറ്റോറിയത്തില് വച്ചായിരുന്നു അസ്ഹറുദീനും പഴകുളം സ്വദേശിനിയും തമ്മിലുള്ള വിവാഹം നടന്നത്. തുടര്ന്ന് ആദ്യരാത്രി വധുവിന്റെ വീട്ടില് ഇവര് ചിലവിട്ടു. പുലര്ച്ച മൂന്നോടെ സുഹൃത്തിന് അപകടം പറ്റിയെന്നും പറഞ്ഞ് യുവാവ് വധുവിന്റെ വീട്ടില് നിന്നും പോയി.
പിന്നീട് ഇയാളെ ഫോണില് ബന്ധപ്പെടാന് ശ്രമിച്ചപ്പോള് ഫോണ് സ്വിച്ച് ഓഫ് ആയിരുന്നു. സംശയം തോന്നിയ വീട്ടുകാര് പരിശോധന നടത്തിയപ്പോള് സ്വര്ണവും പണവും നഷ്ടപ്പെട്ടതായി മനസിലായി. തുടര്ന്ന് വധുവിന്റെ പിതാവ് പൊലീസില് പരാതി നല്കുകയായിരുന്നു.
തുടര്ന്ന് പൊലീസ് നടത്തിയ അന്വേഷണത്തില് രണ്ട് വര്ഷം മുന്പ് ആലപ്പുഴ ചേപ്പാട് സ്വദേശിനിയായ യുവതിയെ ഇയാള് വിവാഹം കഴിച്ചുവെന്ന് മനസിലായി. തുടര്ന്ന് ആദ്യഭാര്യയുടെ വീട്ടില് നിന്നും ഇയാളെ പൊലീസ് പിടികൂടി. പ്രതിയെ കോടതിയില് ഹാജരാക്കി റിമാന്ഡ് ചെയ്തു.