കൊച്ചി നഗരത്തിലെ മംഗളവനത്തില് ദുരൂഹ സാഹചര്യത്തില് മരിച്ച നിലയില് കണ്ടെത്തിയ വ്യക്തിയെ തിരിച്ചറിഞ്ഞു. കമ്പി നട്ടെല്ലില് തുളച്ചുകയറിയ നിലയിലാണ് മൃതദേഹം കണ്ടെത്തിയത്. ജാര്ഖണ്ഡ് വെസ്റ്റ് സിങ്ഭും ജില്ലക്കാരനായ ബഹാദൂര് സന്ഡി ആണ് മരിച്ചതെന്ന് തിരിച്ചറിഞ്ഞു. ഡിസംബര് 14ന് ആയിരുന്നു മൃതദേഹം കണ്ടെത്തിയത്.
കമ്പി നട്ടെല്ലില് തറച്ചു കയറിയതാണ് മരണ കാരണമെന്നാണ് പ്രാഥമിക നിഗമനം. മരണത്തില് ദുരൂഹതകള് ഉള്ളതായി സൂചനകളില്ലെന്നാണ് പൊലീസിന്റെ വാദം. പോസ്റ്റ്മോര്ട്ടം റിപ്പോര്ട്ട് ലഭിച്ചശേഷം മാത്രമേ വിഷയത്തില് കൂടുതല് വ്യക്തത ലഭിക്കൂവെന്നും പൊലീസ് അറിയിച്ചു. സിഎംആര്എഫ്ഐ ഓഫീസിന് മുന്വശത്തുള്ള ഗേറ്റില് കോര്ത്ത നിലയിലായിരുന്നു മൃതദേഹം.
മംഗളവനം ജീവനക്കാരനായിരുന്നു മൃതദേഹം ആദ്യം കണ്ടത്. തുടര്ന്ന് പൊലീസില് വിവരം അറിയിക്കുകയായിരുന്നു. യുവാവിന്റെ ഭാര്യയാണ് മൃതദേഹം തിരിച്ചറിഞ്ഞത്. മരിച്ച ബഹാദൂര് സന്ഡിയും കുടുംബവും കൊച്ചി നഗരത്തില് താത്കാലിക ടെന്റ് കെട്ടി താമസിക്കുകയായിരുന്നു. ബഹാദൂര് സന്ഡി വിവിധ ജോലികള് നോക്കിയാണ് കുടുംബം പുലര്ത്തിയിരുന്നത്.
കളമശേരി മെഡിക്കല് കോളേജ് ആശുപത്രിയിലെ പോസ്റ്റ്മോര്ട്ടത്തിനു ശേഷം മൃതദേഹം കളമശേരി ശ്മശാനത്തില് സംസ്കരിക്കുന്നതിനായി വിട്ടുകൊടുക്കും.