നിലംബൂർ എംഎൽഎ പി.വി അൻവറിന് വിമർശനവുമായി കെ.കെ രമ രംഗത്ത്. മുഖ്യ മന്ത്രിക്കെതിരെ നടത്തിയ രൂക്ഷ വിമർശനങ്ങൾക്ക് പിന്നാലെയാണ് പി.വി അൻവറിന്റെ എതിരെ കെ.കെ രമ രംഗത്ത് എത്തിയത്. ‘ഇന്നോവ, മാഷാ അള്ള’ എന്നാണ് കെ.കെ രമയുടെ ഫേസ്ബുക്ക് കുറിപ്പ്. അതെ സമയം ടി.പി ചന്ദ്രശേഖരന്റെ കൊലപാതകവുമായി ഉള്ള ഓർമപ്പെടുത്തലാണ് കെ.കെ രമ ഫേസ്ബുക്കിലൂടെ നടത്തിയത് എന്ന കമന്റുമായി നിരവധി പേർരംഗത്ത് എത്തിയിട്ടുണ്ട്.
വാർത്താസമ്മേളനത്തിൽ മുഖ്യമന്ത്രി പിണറായി വിജയനെതിരെ രൂക്ഷമായ ഭാഷയിലാണ് അൻവർ വിമർശനങ്ങൾ ഉന്നയിച്ചത്. മുഖ്യമന്ത്രിയുടെ ഗ്രാഫ് നൂറിൽ നിന്ന് പൂജ്യമായെന്നും പിണറായി എന്ന സൂര്യൻ കെട്ടുപോയെന്നും പി വി അൻവർ പറഞ്ഞു. അഴിമതിക്കാരനായ എഡിജിപി എം ആർ അജിത്കുമാറിനെ മുഖ്യമന്ത്രി താലത്തിൽ കൊണ്ട് നടക്കുകയാണെന്നും പി വി അൻവർ കുറ്റപ്പെടുത്തിയിരുന്നു.
അതേസമയം എംഎൽഎ സ്ഥാനം രാജിവെക്കില്ലെന്ന് പി വി അൻവർ എംഎൽഎ വ്യക്തമാക്കിയിരുന്നു. എം എൽ എ സ്ഥാനം തന്നത് ജനങ്ങളാണെന്നും പാർട്ടി പറഞ്ഞാലും എംഎൽഎ സ്ഥാനം രാജിവക്കില്ലെന്ന് അൻവർ വാര്ത്താസമ്മേളനത്തില് അറിയിച്ചു. എംഎൽഎ സ്ഥാനം രാജിവെക്കുമെന്ന അഭ്യൂഹങ്ങൾക്കിടെയാണ് അൻവർ നിലപാട് വ്യക്തമാക്കിയത്. വിവാദങ്ങൾക്കിടെ പുതിയ പാർട്ടി പ്രഖ്യാപന സാധ്യത തള്ളാതെയായിരുന്നു പിവി അൻവറിന്റെ വാര്ത്താസമ്മേളനം. ഞായറാഴ്ച നിലമ്പൂരിൽ പൊതുസമ്മേളനം വിളിക്കുമെന്നും അന്ന് അടുത്ത നീക്കം ജനങ്ങളെ അറിയിക്കുമെന്നും അൻവർ പറഞ്ഞു.