സംസ്ഥാനത്തെ 31 തദ്ദേശവാര്ഡുകളില് ഉപതിരഞ്ഞെടുപ്പ് ആരംഭിച്ചു. വോട്ടെടുപ്പ് രാവിലെ ഏഴ് മുതല് വൈകിട്ട് ആറ് വരെയാണ്. തിരിച്ചറിയല് രേഖകളായി കേന്ദ്ര തിരഞ്ഞെടുപ്പ് കമ്മീഷന് നല്കിയിട്ടുള്ള തിരിച്ചറിയല് കാര്ഡ്, പാസ്പോര്ട്ട്, ഡ്രൈവിംഗ് ലൈസന്സ്, പാന്കാര്ഡ്, ആധാര്കാര്ഡ്, ഫോട്ടോ പതിച്ചുള്ള എസ്.എസ്.എല്.സി ബുക്ക്, ഏതെങ്കിലും ദേശസാല്കൃത ബാങ്കില് നിന്നും തിരഞ്ഞെടുപ്പ് തീയതിക്ക് ആറ് മാസക്കാലയളവിന് മുന്പുവരെ നല്കിയിട്ടുള്ള ഫോട്ടോ പതിച്ച പാസ്ബുക്ക്, സംസ്ഥാന തിരഞ്ഞെടുപ്പ് കമ്മീഷന് നല്കിയിട്ടുള്ള തിരിച്ചറിയല് കാര്ഡ് എന്നിവ ഉപയോഗിക്കാം. വോട്ടു ചെയ്യുന്നവരുടെ ഇടതു കൈയ്യിലെ ചൂണ്ടുവിരലിന് പകരം നടുവിരലിലാണ് മായാത്ത മഷി പുരട്ടുക. ലോക്സഭാ, നിയമസഭാ ഉപതിരഞ്ഞെടുപ്പുകള് അടുത്തിടെ നടന്നതിനാലാണിത്.
മലപ്പുറം ജില്ലാ പഞ്ചായത്തിലെ തൃക്കലങ്ങോട് വാര്ഡ് ഉള്പ്പെടെ പതിനൊന്ന് ജില്ലകളിലായി നാല് ബ്ലോക്ക്പഞ്ചായത്ത് വാര്ഡുകള്, മൂന്ന് മുനിസിപ്പാലിറ്റി വാര്ഡുകള്, 23 ഗ്രാമപഞ്ചായത്ത് വാര്ഡുകളിലുമാണ് ഉപതിരഞ്ഞെടുപ്പ് നടത്തുന്നത്. ആകെ 102 സ്ഥാനാര്ഥികളാണ് ജനവിധി തേടുന്നത്. 50 പേര് സ്ത്രീകള്. വോട്ടെടുപ്പിന് 192 പോളിംഗ് ബൂത്തുകള് സജ്ജമാക്കിയിട്ടുണ്ട്.
ഉപതിരഞ്ഞെടുപ്പിനുള്ള അന്തിമ വോട്ടര്പട്ടിക ഒക്ടോബര് 19 ന് പ്രസിദ്ധീകരിച്ചിട്ടുണ്ട്. ആകെ 151055 വോട്ടര്മാരാണുള്ളത് 71967 പുരുഷന്മാരും 79087 സ്ത്രീകളും. ഒരു ട്രാന്സ്ജെന്ഡറുമുണ്ട്. കമ്മീഷന്റെ www.sec.kerala.gov.in വെബ്സൈറ്റിലും ബന്ധപ്പെട്ട തദ്ദേശസ്ഥാപനങ്ങളിലും വോട്ടര്പട്ടിക പരിശോധിക്കാം.
പ്രശ്നബാധിത ബൂത്തുകളില് പ്രത്യേക പോലീസ് സുരക്ഷ ഏര്പ്പെടുത്തും. വോട്ടെണ്ണല് ഡിസംബര് 11ന് രാവിലെ 10ന് വിവിധ കേന്ദ്രങ്ങളില് നടത്തും. ഫലം www.sec.kerala.gov.in വെബ്സൈറ്റിലെ TREND ല് ലഭ്യമാകും.