“മദ്യത്തിനടിമയും കടുത്ത പുകവലിക്കാരനുമായിരുന്നു ഞാന്. എന്നിട്ടും 39 മിനിറ്റും 8 സെക്കന്റും കൊണ്ട് അക്കാലത്ത് പതിനായിരം മീറ്റര് ഓടിയത് പത്രത്തില് വാര്ത്തയായിരുന്നു.
ഡോക്ടര് പറഞ്ഞത് അനുസരിച്ച് ദുശ്ശീലങ്ങള് നിര്ത്താന് തീരുമാനിച്ചു. 1983 -ല് 42-ാം വയസ്സില് നിര്ത്തി.”
തൃശൂരടുത്ത് അത്താണി സ്വദേശിയായ ജോസേട്ടനിപ്പോള് 80-ാം വയസില് 4500 കിലോമീറ്റര് സൈക്കിള് ചവിട്ടി ഹിമാലയത്തിലെത്തി കടല്നിരപ്പില് നിന്നും 17600 അടി മുകളിലാണ് നില്ക്കുന്നത്. സിവിലിയന്മാര്ക്ക് അനുവദനീയമായ ഏറ്റവും ഉയരത്തിലുള്ള ലഡാക്കിലെ ഖര്ദൂങ് ലാ യില്.
മുമ്പ് തൃശൂര് മെഡിക്കല് കോളജില് പ്ലംബറായിരുന്ന ജോസേട്ടന് യുവസുഹൃത്തായ ഗോകുലിനൊപ്പമാണ് ജൂലൈ പതിനഞ്ചിന് സൈക്കിള് സഞ്ചാരത്തിനിറങ്ങിയത്. ലക്ഷ്യത്തിനെത്തുന്നതിന് അഞ്ചു കിലോമീറ്റര് മുമ്പ് ഓക്സിജന് കിട്ടാതെ ജീവന് അപകടത്തിലാകുമെന്ന അവസ്ഥ വന്നു. പക്ഷെ അതിജീവിച്ചു. ദുശ്ശീലങ്ങള് ഒഴിവാക്കി കാത്തുസൂക്ഷിച്ച ആരോഗ്യത്തിന്റെയും അതിലുപരി ആത്മവിശ്വാസത്തിന്റെയും ബലത്തില് യാത്ര തുടരുകയാണ് കഠിനാദ്ധ്വാനിയായ ഈ മനുഷ്യന് !