മലയാള സിനിമയില് നിരവധി മാസ് കഥാപാത്രങ്ങള് അവതരിപ്പിച്ച താരമാണ് നടി ഫിലോമിന. കമ്മ്യൂണിസ്റ്റ് നാടകങ്ങളില് അഭിനയിക്കരുത് എന്ന് പറഞ്ഞ പള്ളീലച്ചനെ നിലയ്ക്ക് നിര്ത്തിയതിനെ കുറിച്ച് ഫിലോമിന പറഞ്ഞ വാക്കുകളാണ് സോഷ്യല് മീഡിയയില് ഇപ്പോഴും ശ്രദ്ധ നേടുന്നത്. നാടകം കണ്ട് തന്നെ അഭിനന്ദിക്കേണ്ടി വന്ന അച്ചനെ കുറിച്ചാണ് താരം പറയുന്നത്.
അന്ന് നാടകത്തില് അഭിനയിക്കുന്നതിനോട് ഭയങ്കര എതിര്പ്പായിരുന്നു. പള്ളീലച്ചന് വിളിച്ചു പറഞ്ഞു കമ്മ്യൂണിസ്റ്റ് നാടകത്തില് അഭിനയിക്കാന് പാടില്ല. എനിക്ക് ഒരു കുട്ടിയുണ്ട്, അതിനെ വളര്ത്താനാണ് ഈ പണിക്ക് പോകുന്നത്. അച്ചന് ഒരു കാര്യം ചെയ് 5000 രൂപ വെച്ച് മാസം തന്നോളു, പിന്നെ ഈ പടിക്ക് പുറത്തിറങ്ങില്ല എന്ന് പറഞ്ഞു.
അത് സാധിക്കില്ല, അച്ചന് പിന്നെ എന്നെ കുറേ വഴക്ക് പറഞ്ഞു, കമ്മ്യൂണിസ്റ്റ് നാടകങ്ങളില് പോകുന്നതിന്. അപ്പോള് നാട്ടില് ഒരു നാടകം നടത്താന് തീരുമാനിച്ചു. പിള്ളേരോട് പറഞ്ഞു, നാടകം എഴുത്, പരിപാടിയില് അച്ചനെ തന്നെ അദ്ധ്യക്ഷനായി കൊണ്ടു വരണമെന്ന്. അന്ന് ഞാന് ആണിന്റെ വേഷത്തിലായിരുന്നു.
തൊപ്പിയും മീശയും വെച്ച് സിഗരറ്റ് ഒക്കെ വലിച്ച്. അന്ന് 23 വയസുണ്ടായിരുന്നു. അന്ന് കാലിന് മേല് കാല് കേറ്റി വെച്ച് സിഗരറ്റ് ഒക്കെ വലിച്ച് നല്ല അസ്സലായി അച്ചന്റെ മുമ്പില് അഭിനയിച്ചു കാണിച്ച് കൊടുത്തു. നാടകം കണ്ട് അച്ചന് മേക്കപ്പ് റൂമിലേക്ക് ഓടി വന്നു, ”ഫിലോമിന ചേച്ചി നമസ്കാരം, ആ വേഷം വളരെ നന്നായിരുന്നു” എന്നു പറഞ്ഞു എന്നാണ് നടി കൈരളി ടിവിക്ക് നല്കിയ പഴയ അഭിമുഖത്തില് പറയുന്നത്.