ജവാൻ ചിത്രത്തിന്റെ ഭാഗമായതിന് യോഗി ബാബുവിന് നന്ദി പറഞ്ഞ് ഷാരൂഖ് ഖാൻ. അറ്റ്ലിയുടെ സംവിധാനത്തിലൊരുങ്ങിയ ജവാന്റെ ഓഡിയോ ലോഞ്ചിനിടെയാണ് ഹാസ്യതാരം യോഗി ബാബുവിനെക്കുറിച്ച് ഷാരൂഖ് സംസാരിച്ചത്. യോഗി ബാബു വളരെ ലജ്ജയുള്ള ശാന്തനായ വ്യക്തിയാണെന്നും അദ്ദേഹം പറഞ്ഞു.
‘യോഗി ബാബു വളരെ ലജ്ജയുള്ള, ശാന്തനായ ഒരു വ്യക്തിയാണ്. ഞാന്‍ ഓര്‍ക്കുന്നു, സിനിമയുടെ പ്രമോഷനുവേണ്ടി ഞാൻ ചെന്നെെയിൽ വന്നപ്പോൾ തിയേറ്ററിൽ ഉണ്ടായിരുന്ന എല്ലാവരും ആവേശത്തോടെ ഒച്ച വയ്ക്കുകയും കയ്യടിക്കുകയും ചെയ്തു. അവര്‍ എന്നെ കണ്ടിട്ടാണ് ബഹളം വച്ചതെന്ന് കുറച്ച് സമയത്തേക്കു വിചാരിച്ചു. പിന്നീടാണ് എനിക്ക് മനസ്സിലായത്. എല്ലാവരും എന്നെ തള്ളിമാറ്റി മുന്നോട്ട് വന്നു. അവര്‍ ബഹളം വച്ചത് യോഗി ബാബുവിനെ കാണാനായിരുന്നു. ജവാന്റെ ഭാഗമായതിന് നന്ദി’ ഷാരൂഖ് ഖാൻ പറഞ്ഞു.
ജവാനിൽ സംഗീതമൊരുക്കിയ അനിരുദ്ധിനെക്കുറിച്ചും താരം വാചാലനായി. അനിരുദ്ധ് തനിക്ക് സ്വന്തം മകനെപ്പോലെയാണ് എന്നും തന്റെ ഫോൺ കോളുകൾ മിസ് ചെയ്യുമെന്ന് അനിരുദ്ധ് പറയാറുണ്ടെന്നും ഷാരൂഖ് പറഞ്ഞു.
തമിഴിലെ ഒരുകാലത്തെ ഹിറ്റ് ഗാനങ്ങളിൽ ഒന്നായിരുന്ന ‘വെെ ദിസ് കൊലവെറി’ ഇറങ്ങിയ സമയം മുതൽ അനിരുദ്ധിനെ കാണാൻ ആഗ്രഹിക്കുകയാണ്. ചിത്രത്തിലെ ഒരു ഗാനം അനിരുദ്ധിനെക്കൊണ്ട് ചെയ്യിപ്പിച്ചാലോ എന്ന് അറ്റ്ലി ചോദിച്ചു. എല്ലാ ഗാനങ്ങളും അനിരുദ്ധിനെക്കൊണ്ട് ചെയ്യിപ്പിക്കാമെന്ന് താൻ പറഞ്ഞുവെന്നും ഷാരൂഖ് കൂട്ടിച്ചേർത്തു.
