സിദ്ദിഖ്-ലാൽ കൂട്ടുകെട്ടിലെത്തിയ റാംജി റാവു സ്പീക്കിങ് എന്ന ചിത്രത്തിലൂടെ പ്രേക്ഷകരെ ചിരിപ്പിച്ച് കൊണ്ട് സിനിമയിൽ ചുവടുവച്ച താരമാണ് സായ് കുമാർ. പിന്നീട് മോഹൻലാൽ, മമ്മൂട്ടി സിനിമകളിൽ ഒപ്പത്തിനൊപ്പം നിൽക്കുന്ന വില്ലനായും മറ്റും നിരവധി സിനിമകളിൽ തിളങ്ങി.
അത്രയും റേഞ്ചുള്ള ഒരു നടനാണ് എന്ന് പറയുകയാണ് നിർമാതാവ് ബൈജു അമ്പലക്കര. മമ്മൂട്ടി, മോഹൻലാലിൽ എന്നിവരെപോലെ സൂപ്പർ താരമായി മാറേണ്ടിയിരുന്ന നടനായിരുന്നു സായ് കുമാർ എന്നും ബൈജു അമ്പലക്കര പറഞ്ഞു. മാസ്റ്റർ ബിൻ എന്ന യൂട്യൂബ് ചാനലിന് നൽകിയ അഭിമുഖത്തിൽ റാംജി റാവു സ്പീക്കിങ് എന്ന് സിനിമയെക്കുറിച്ചും സായ് കുമാറിനെക്കുറിച്ചും സംസാരിക്കുകയായിരുന്നു അദ്ദേഹം.
‘അയാൾ ഒരു കലാകാരനാണ്, വലിയൊരു കലാകാരന്റെ മകൻ കൂടിയാണ്. മോഹൻലാലിനൊക്കെ ഒപ്പമെത്തേണ്ട നടനായിരുന്നു. ഇത്രയും റേഞ്ചുള്ള ഒരു നടൻ എന്ന് മമ്മൂക്ക വരെ എന്നോട് പറഞ്ഞിട്ടുണ്ട്. ശരീരം നല്ല രീതിയിൽ നോക്കി, നല്ല സംവിധായകരുടെ സിനിമകളിൽ അഭിനയിച്ചിരുന്നെങ്കിൽ സൂപ്പർ സ്റ്റാർ ആയേനെ’
‘ഡയലോഗ് ഒന്ന് ചുമ്മാ പറഞ്ഞു കൊടുത്താൽ മതി, അതു കഴിഞ്ഞ് പുള്ളി പെർഫോം ചെയ്യുന്ന കണ്ടാൽ നമ്മൾ തന്നെ അത്ഭുതപ്പെട്ടു പോകും. ഇത് എവിടെ നിന്ന് വരുന്നു എന്നതാണ്. അത്രയും റേഞ്ചുള്ള ഒരു നടനാണ് .പുള്ളിക്ക് പറ്റിയ അബദ്ധം എന്തെന്നാൽ അദ്ദേഹത്തിന്റെ ശരീരം നോക്കിയില്ല, നല്ല സംവിധായകരുടെ സിനിമകളിൽ കഥാപാത്രം നോക്കാതെ പോയി അഭിനയിച്ചു. അതോടെ ആ രീതിയങ്ങ് മാറി’
‘വാരിവലിച്ച് കുറെ സിനിമകൾ ചെയ്തതാണ് അദ്ദേഹത്തിന് പറ്റിപ്പോയത്. അത് കൺട്രോൾ ചെയ്യാൻ ആളില്ലാതെ പോയി. മമ്മൂട്ടി, മോഹൻലാൽ, പൃഥ്വിരാജ്, ജയറാം ഇവരൊക്കെ വളരെ നോക്കിക്കണ്ടാണ് സിനിമകൾ ചെയ്തത്. അങ്ങനെ കുറെ സിനിമകൾ ചെയ്ത് കഴിഞ്ഞപ്പോൾ പിന്നെ വില്ലൻ കളിക്കേണ്ടി വന്നു. നായക പരിവേഷം മാറി. ശരീരപ്രകൃതി മാറി, ആഹാരത്തിൽ ഒന്നും പുള്ളിക്ക് നിയന്ത്രണം ഉണ്ടായിരുന്നില്ല’ ബൈജു അമ്പലക്കര പറഞ്ഞു.