ഒമര് ലുലു ചിത്രം ബാഡ് ബോയ്സിന്റെ ടൈറ്റില് ലോഞ്ച് എഴുപുന്നയില് നടന്നു. തീര്ത്തും കോമഡി ഫണ് എന്റര്ടെയ്നറായ ഈ ചിത്രം അബാം മൂവീസിന്റെ ബാനറില് ഷീലു എബ്രഹാം അവതരിപ്പിച്ച് എബ്രഹാം മാത്യുവാണ് നിര്മ്മിക്കുന്നത്. റഹ്മാന്, ധ്യാന് ശ്രീനിവാസന്, ഷീലു ഏബ്രഹാം എന്നിവരാണ് ചിത്രത്തില് പ്രധാന വേഷങ്ങളിലെത്തുന്നത്.
അബാം മൂവിസിന്റെ പതിനഞ്ചാമത് ചിത്രമാണിത്. ബാബു ആന്റണി, ബിബിന് ജോര്ജ്, അജു വര്ഗീസ്, ആന്സണ് പോള്, സെന്തില് കൃഷ്ണ, ടിനി ടോം, ഹരിശ്രീ അശോകന്, രമേഷ് പിഷാരടി, ശരത് സഭ, രവീന്ദ്രന്, മല്ലിക സുകുമാരന് എന്നിവരാണ് ചിത്രത്തിലെ മറ്റ് താരങ്ങള്. അഡാര് ലൗ എന്ന ഒമര് ചിത്രത്തിന്റെ തിരക്കഥാകൃത്ത് സാരംഗ് ജയപ്രകാശ് ആണ് ബാഡ് ബോയ്സിന്റെ തിരക്കഥ ഒരുക്കുന്നത്.
ചിത്രത്തിന്റെ കഥ ഒമര് ലുലുവിന്റേതാണ്. ജോസഫ് നെല്ലിക്കല് കലാസംവിധാനം നിര്വഹിക്കുന്ന ചിത്രത്തിന്റെ ഛായാഗ്രഹണം ആല്ബിയാണ്. അമീര് കൊച്ചിന്, ഫ്ലെമി എബ്രഹാം എന്നിവരാണ് എക്സിക്യൂട്ടീവ് പ്രൊഡ്യൂസേഴ്സ്. ചിത്രത്തിന്റെ സംഗീതം വില്യം ഫ്രാന്സിസും എഡിറ്റിംഗ് ദിലീപ് ഡെന്നീസും നിര്വ്വഹിക്കും.