ആദിത്യ പരമേശ്വരനൊപ്പം പുതുജീവിതം ആരംഭിച്ചിരിക്കുകയാണ് ഗായിക അഞ്ജു ജോസഫ്. ശനിയാഴ്ചയാണ് അഞ്ജുവും ആദിത്യയും വിവാഹിതരായത്. ആലപ്പുഴ രജിസ്ട്രാര്‍ ഓഫീസില്‍ വെച്ച് നടന്ന വിവാഹത്തിന്റെ ചിത്രങ്ങള്‍ അഞ്ജു പങ്കുവെച്ചിരുന്നു. ഭാവിയിലെ തന്റെ പ്രതീക്ഷയും സ്വപ്‌നവും എന്ന ക്യാപ്ഷനോടെ ആയിരുന്നു ചിത്രങ്ങള്‍ പങ്കുവച്ചത്.
ഇതിന് പിന്നാലെ വിവാഹ റിസ്പഷന്റെ വീഡിയോകളും സോഷ്യല്‍ മീഡിയയില്‍ എത്തിയിരുന്നു. റിസപ്ഷന്‍ വേദിയില്‍ അഞ്ജുവിനൊപ്പം പാട്ട് പാടുന്ന ആദിത്യന്റെ വീഡിയോയാണ് ഇപ്പോള്‍ വൈറല്‍. അമ്പിളി എന്ന സിനിമയിലെ ‘എന്റെ നെഞ്ചാകെ നീയല്ലേ…’ എന്ന ഗാനമാണ് അഞ്ജുവും ആദിത്യയും ചേര്‍ന്ന് ആലപിച്ചത്.
എന്നാല്‍ പാട്ടിന്റെ ഇടയില്‍ വികാരാധീനനായ ആദിത്യ വിതുമ്പുകയായിരുന്നു. ഇതോടെ ഭര്‍ത്താവിനെ ആശ്വസിപ്പിച്ച അഞ്ജു തുടര്‍ന്ന് പാടാന്‍ പ്രോത്സാഹിപ്പിച്ചു. ഇതിനിടെ ഇവന്‍ എന്നേക്കൂടെ കരയിക്കുമല്ലോ ഈശ്വരാ എന്ന കമന്റും താരം പാസാക്കി. അതേസമയം, വിവാഹം സ്വകാര്യ ചടങ്ങായി നടത്താനാണ് ആഗ്രഹിച്ചതെന്നും അതുകൊണ്ടാണ് മാധ്യമങ്ങളെ അറിയിക്കാതിരുന്നതെന്നുമാണ് അഞ്ജു പ്രതികരിച്ചത്.
പ്രണയവിവാഹമാണോ എന്നതിനെ കുറിച്ചും തങ്ങള്‍ പരിചയപ്പെട്ടതിനെ കുറിച്ചും ഇപ്പോള്‍ പറയാന്‍ ആഗ്രഹിക്കുന്നില്ലെന്നും അത് സ്വകാര്യമായി വയ്ക്കാനാണ് താല്പര്യമെന്നുമാണ് ഇരുവരും പ്രതികരിച്ചത്. പിന്നീട് ഒരു അവസരത്തില്‍ അക്കാര്യം പറയാമെന്നുമാണ് ഇരുവരും പറഞ്ഞത്.