കമല്ഹാസന് മതനിരപേക്ഷ ജനാധിപത്യ മൂല്യങ്ങള്ക്കായി അടിയുറച്ചു നിലകൊള്ളുന്ന പൊതുപ്രവര്ത്തകന് കൂടിയാണെന്ന് മുഖ്യമന്ത്രി പിണറായി വിജയന്. പിറന്നാളാശംസകള് അറിയിച്ച് മുഖ്യമന്ത്രി പങ്കുവച്ച കുറിപ്പിലാണ് താരത്തിന്റെ രാഷ്ട്രീയത്തെയും നിലപാടുകളെയും വ്യക്തമാക്കുന്നത്. തന്റെ ഫേസ്ബുക്ക് അക്കൗണ്ടിലൂടെയാണ് മുഖ്യമന്ത്രി കമല്ഹാസന് ആശംസകള് അറിയിച്ചത്.
പ്രിയ സുഹൃത്ത് കമല് ഹാസന് ജന്മദിനാശംസകള് എന്ന് തുടങ്ങുന്നതായിരുന്നു കുറിപ്പ്. ബഹുമുഖമായ സര്ഗാവിഷ്കാരങ്ങളിലൂടെ സിനിമാരംഗത്ത് തന്റേതായ ഇടം നേടിയ പ്രതിഭയാണ് കമല് ഹാസന്. മതനിരപേക്ഷ, ജനാധിപത്യ മൂല്യങ്ങള്ക്കായി അടിയുറച്ചു നിലകൊള്ളുന്ന പൊതുപ്രവര്ത്തകന് കൂടിയാണ് അദ്ദേഹമെന്നും മുഖ്യമന്ത്രി കുറിച്ചു.
തന്റെ നാടിനോടും ജനതയോടും അദ്ദേഹത്തിനുള്ള സ്നേഹവും പ്രതിബദ്ധതയും സമാനതകളില്ലാത്തതാണ്. കേരളത്തെയും ഒരു ജനതയെന്ന നിലയില് നാം കൈവരിച്ച സാമൂഹിക പുരോഗതിയെയും കമല് ഹാസന് സ്നേഹപൂര്വ്വം നോക്കികാണുന്നുവെന്നത് ഏറെ സന്തോഷം തരുന്ന കാര്യമാണ്. അദ്ദേഹത്തിന് എല്ലാ വിധ ഭാവുകങ്ങളും നേരുന്നുവെന്ന് അറിയിച്ചാണ് പിണറായിയുടെ കുറിപ്പ് അവസാനിക്കുന്നത്.