തിയേറ്ററുകളിൽ കളക്ഷൻ റെക്കോഡുകൾ സൃഷ്ടിച്ച് മുന്നേറുകയാണ് നെൽസന്റെ രജനികാന്ത് ചിത്രം ‘ജയിലർ’. മുത്തുവേൽ പാണ്ഡ്യൻ എന്ന ജയിലറുടെ വേഷത്തിലാണ് തലൈവർ ചിത്രത്തിൽ എത്തിയത്. ആരാധകരെ ആവേശത്തിലാക്കിയ ടെെഗർ മുത്തുവേലിന്റെ ട്രാൻസ്ഫോമേഷൻ രംഗം പുറത്തു വിട്ടിരിക്കുകയാണ് അണിയറപ്രവർത്തകർ ഇപ്പോൾ.
അനിരുദ്ധിന്റെ പശ്ചാത്തല സംഗീത്തിൽ ചിത്രത്തിൽ ചില മാസ് രംഗങ്ങൾ ഉൾപ്പെടുത്തിയാണ് വീഡിയോ പുറത്തിറക്കിയിരിക്കുന്നത്. നെൽസൺ ദിലീപ് കുമാർ സംവിധാനം ചെയ്ത ചിത്രത്തിൽ രജനികാന്തിനെ കൂടാതെ, മലയാളത്തിന്റെ സൂപ്പർ താരം മോഹൻലാലും, വിനായകനും, കന്നട സൂപ്പർ താരം ശിവരാജ് കുമാറും പ്രധാന വേഷങ്ങളിലെത്തിയിരുന്നു.
വിജയ് കാർത്തിക് ഛായാഗ്രഹണം നിർവഹിച്ച ചിത്രത്തിൽ അനിരുദ്ധ് രവിചന്ദറാണ് സംഗീതമൊരുക്കിയിരിക്കുന്നത്. ചിത്രത്തിന്റെ ലാഭവിഹിതത്തിൽ നിന്നും നിർമ്മാതാക്കൾ കഴിഞ്ഞ ദിവസങ്ങളിൽ ചിത്രത്തിലെ താരങ്ങൾക്കും മറ്റും സമ്മാനങ്ങൾ നൽകിയതും ശ്രദ്ധേയമായിരുന്നു.
ഓഗസ്റ്റ് 10 ന് റിലീസ് ചെയ്ത ചിത്രം മികച്ച പ്രതികരണങ്ങളോടെയാണ് തുടക്കം മുതൽ മുന്നേറിയത്. ഏറ്റവും കൂടുതൽ കളക്ഷൻ നേടുന്ന തമിഴ് സിനിമയായി ഇതോടെ ‘ജയിലർ’ മാറി.