പുതുവര്‍ഷത്തില്‍ ആരാധകരെ ഞെട്ടിച്ചുകൊണ്ട് ഷാരൂഖ് ഖാന്റെ വേഷപകര്‍ച്ച. ആനന്ദ് എല്‍ റായിയുടെ പുതിയ ചിത്രമായ സീറോയില്‍ ഇത്തിരി കുഞ്ഞനായ ഷാരൂഖിനെ കണ്ട് അന്തം വിട്ടിരിക്കുകയാണ് ആരാധകര്‍. ടീസര്‍ ഷാരൂഖ് തന്നെയാണ് ട്വിറ്ററിലൂടെ പുറത്തുവിട്ടത്.
“എന്റെ ജീവിതമാകുന്ന മേളയുടെ ടിക്കറ്റ് എടുത്തു കാത്തിരിക്കുന്നവരേ, കളി പൂര്‍ണ്ണമാവുക തന്നെ വേണമല്ലോ” എന്നാണ് ഷാരൂഖ് കുറിച്ചത്. ശശി കപൂര്‍ നായകനായ “ജബ് ജബ് ഫൂല്‍ ഖിലെ” എന്ന ചിത്രത്തിലെ “ഹം കോ തും പെ പ്യാര്‍ ആയാ” എന്ന ഗാനത്തിന് ചുവടുവക്കുന്ന കുഞ്ഞന്‍ കിംഗ് ഖാനെയാണ് ടീസറില്‍ കാണാനാകുക. സ്പെഷ്യല്‍ ഇഫക്റ്റ്സ് വഴിയാണ് ഷാരൂഖിനെ മൂന്നടിക്കാരനാക്കി മാറ്റിയത്.
അനുഷ്‌ക ശര്‍മയും കത്രീന കൈഫുമാണ് ചിത്രത്തിലെ നായികമാര്‍. ബുദ്ധിമാന്ദ്യമുള്ള സ്ത്രീയെയാണ് അനുഷക ചിത്രത്തില്‍ അവതരിപ്പിക്കുന്നത്. അനുഷ്‌കയും ഷാരൂഖും ഒന്നിച്ച് അഭനിയിക്കുന്ന നാലാമത്തെ ചിത്രമാണ് സീറോ.ഈ വര്‍ഷം ഡിസംബര്‍ 21നാണ് സീറോ തിയ്യേറ്ററുകളില്‍ എത്തുക. സല്‍മാന്‍ ഖാന്‍, ദീപിക പദുകോണ്‍, റാണി മുഖര്‍ജീ, കജോള്‍, ആലിയ ഭട്ട്, ശ്രീദേവി, കരിഷ്മ കപൂര്‍, ജൂഹി ചാവ്ല എന്നിവര്‍ അതിഥി വേഷങ്ങളില്‍ എത്തുമെന്നും അഭൂഹങ്ങളുണ്ട്.