സാമന്ത മുഖ്യവേഷത്തിലെത്തുന്ന യശോദ റിലീസ് ചെയ്ത് ആദ്യദിനം തന്നെ കോടികളാണ് കളക്ഷനായി നേടിയത്. ആദ്യ ദിവസം ആറ് കോടി രൂപയാണ് ചിത്രം നേടിയത്. ചിത്രത്തിന് സമ്മിശ്രപ്രതികരണമാണ് ലഭിക്കുന്നതെങ്കിലും സാമന്തയുടെ അഭിനയത്തെ പുകഴ്ത്തുകയാണ് നിരൂപകര്‍. ഫൈറ്റ് സീക്വന്‍സുകളിലും വൈകാരിക രംഗങ്ങളിലും സാമന്ത മികച്ച രീതിയിലുള്ള പ്രകടനം കാഴ്ചവെക്കുന്നുവെന്നാണ് പ്രതികരണങ്ങള്‍ പറയുന്നത്.
നവംബര്‍ 11ന് ആണ് യശോദ തീയേറ്ററുകളില്‍ എത്തിയത്. ശ്രീദേവി മൂവീസ് പ്രൊഡക്ഷന്‍സിന്റെ ബാനറില്‍ ശിവലെങ്ക കൃഷ്ണ പ്രസാദ് നിര്‍മ്മിച്ച ചിത്രം, ഹരിയും ഹരീഷും ചേര്‍ന്നാണ് ഈ ചിത്രം സംവിധാനം ചെയ്യുന്നത്.
വരലക്ഷ്മി ശരത്കുമാര്‍, റാവു രമേഷ്, മുരളി ശര്‍മ്മ, സമ്പത്ത് രാജ്, ശത്രു, മധുരിമ, കല്‍പിക ഗണേഷ്, ദിവ്യ ശ്രീപാദ, പ്രിയങ്ക ശര്‍മ്മ തുടങ്ങിയവരും പ്രധാന കഥാപാത്രങ്ങളെ അവതരിപ്പിക്കുന്നു. ഉണ്ണി മുകുന്ദനാണ് നായക കഥാപാത്രത്തെ അവതരിപ്പിക്കുന്നത്.
വാടക ഗര്‍ഭധാരണ വിഷയം ചര്‍ച്ച ചെയ്യുന്ന ചിത്രത്തിന്റെ പ്രധാന ലൊക്കേഷനായി വരുന്നത് ഒരു ആശുപത്രിയാണ്. മണി ശര്‍മ്മയാണ് ചിത്രത്തിന്റെ സംഗീതം നിര്‍വഹിച്ചിരിക്കുന്നത്. എം സുകുമാറാണ് ഛായാഗ്രാഹണം. സാമന്ത മുഖ്യവേഷങ്ങളിലെത്തുന്ന ‘ശാകുന്തളം’, ‘ഖുശി’ എന്നീ ചിത്രങ്ങളുടെ ചിത്രീകരണം നടന്നുവരികയാണ്.അതേസമയം, നടി തന്റെ മുന്‍ ഭര്‍ത്താവ് നാഗ ചൈതന്യയ്‌ക്കൊപ്പം ബിഗ് സ്‌ക്രീനിലൊന്നിക്കുന്നുവെന്നാണ് റിപ്പോര്‍ട്ട്. ഒരു ഫീച്ചര്‍ ഫിലിമിനായാണ് ഇരുവരും ഒന്നിക്കുന്നത്.