സംസ്ഥാന ചലച്ചിത്ര പുരസ്കാര വിതരണ വേദിയിലെ നടൻ അലൻസിയറുടെ വിവാദപരമായ പ്രസ്താവനയിൽ പ്രതികരിച്ച് വനിതാ കമ്മീഷൻ. പുരസ്കാര ജേതാവ് കൂടിയായ നടൻ അലൻസിയർ നടത്തിയ പ്രസ്താവന തീർത്തും അപലപനീയമെന്ന് വനിതാ കമ്മീഷൻ അധ്യക്ഷ പി. സതീദേവി പറഞ്ഞു. സാംസ്കാരിക കേരളത്തിന് ഒട്ടും നിരക്കാത്ത വിധത്തിലുള്ള പരാമർശമാണ് അലൻസിയറുടെ ഭാഗത്ത് നിന്നും ഉണ്ടായിട്ടുള്ളതെന്ന് സതീദേവി കൂട്ടിച്ചേർത്തു.
“ഒരു സ്ത്രീപക്ഷ കാഴ്ചപ്പാട് മുന്നോട്ട് വെച്ചുകൊണ്ടാണ് ചലച്ചിത്ര മേഖലയിലെ അവാർഡിന്റെ ശില്പം ഒരു സ്ത്രീയുടെ രൂപം ആലേഖനം ചെയ്ത ശിൽപ്പമായി നൽകുന്നത്. അഭിമാനത്തോടെ ഇതിനെ കാണുന്നതിന് പകരം അവഹേളിച്ചുകൊണ്ട് ഒരു പ്രസ്താവന നടത്തിയത് തീർത്തും അനുചിതവും, സാംസ്കാരിക കേരളത്തിനും ചലച്ചിത്ര മേഖലയ്ക്കും അവഹേളനം ഉണ്ടാകുന്ന നടപടിയുമാണ് അലൻസിയറുടെ ഭാഗത്ത് നിന്നും ഉണ്ടായിട്ടുള്ളത്.”
തിരുവനന്തപുരം നിശാഗന്ധിയിൽ നടന്ന ചടങ്ങിലാണ് പുരസ്ക്കാരം സ്വീകരിച്ചു കൊണ്ട് അലൻസിയർ വിവാദ പ്രസ്താവന നടത്തിയത്. താരത്തിനെതിരെ ചലച്ചിത്രരംഗത്ത് നിന്നും നിരവധിയാളുകൾ വിമർശനവുമായിരംഗത്ത് വന്നിരുന്നു. എന്നാൽ പ്രസ്താവന തിരുത്താനോ മാപ്പ് പറയാനോ അലൻസിയർ തയ്യാറായില്ല.