അര്ജുന് അശോകനെ നായകനാക്കി ഷാജി അസീസ് സംവിധാനം ചെയ്യുന്ന “വൂള്ഫ്” ചിത്രത്തിന്റെ ടൈറ്റില് പോസ്റ്റര് പുറത്ത്. നടന് ഫഹദ് ഫാസിലിന്റെ ഫെയ്സ്ബുക്ക് പേജിലൂടെയാണ് പോസ്റ്റര് റിലീസ് ചെയ്തിരിക്കുന്നത്. സംയുക്ത മേനോന്, ഷൈന് ടോം ചാക്കോ, ഇര്ഷാദ്, ജാഫര് ഇടുക്കി എന്നിവരാണ് ചിത്രത്തില് പ്രധാന വേഷങ്ങളിലെത്തുന്നത്.
ഒക്ടോബര് 19ന് ആയിരുന്നു ചിത്രത്തിന്റെ ഷൂട്ടിംഗ് ആരംഭിച്ചത്. ജി.ആര് ഇന്ദുഗോപന് തിരക്കഥ ഒരുക്കുന്ന ചിത്രം ദാമര് സിനിമയുടെ ബാനറില് സന്തോഷ് ദാമോദരനാണ് നിര്മ്മിക്കുന്നത്. കര്ശനമായ കോവിഡ് പ്രൊട്ടോക്കോള് പാലിച്ചാണ് ചിത്രീകരണം. രഞ്ജിന് രാജ് ആണ് ചിത്രത്തിന് സംഗീതം ഒരുക്കുന്നത്. ഫായിസ് സിദ്ദീഖ് ഛായാഗ്രഹണവും നിര്വ്വഹിക്കുന്നു.
ഷേക്സ്പിയര് എം.എ മലയാളം എന്ന ചിത്രത്തിന്റെ തിരക്കഥ-സംവിധാന പങ്കാളിയായാണ് ഷാജി അസീസ് സിനിമയിലെത്തിയത്. ഒരിടത്തൊരു പോസ്റ്റ്മാന് എന്ന ചിത്രവും ഒരുക്കിയിട്ടുണ്ട്. എം80 മൂസ എന്ന സോഷ്യല് സറ്റയര് ടിവി സീരിയലിന് ശേഷം ഷാജി അസീസ് വീണ്ടും ഒരുക്കുന്ന സിനിമയാണ് വൂള്ഫ്.
അതേസമയം, തുറമുഖം, തട്ടാശ്ശേരി കൂട്ടം, അജഗജാന്തരം, നാന്സി റാണി എന്നീ ചിത്രങ്ങളാണ് അര്ജുന് അശോകന്റെതായി അണിയറിയില് ഒരുങ്ങുന്ന മറ്റ് സിനിമകള്. ജയസൂര്യ ചിത്രം വെള്ളം, കന്നഡ ചിത്രം ഗാലിപട 2 എന്നീ ചിത്രങ്ങളാണ് സംയുക്ത മേനോന്റെതായി ഒരുങ്ങുന്നത്.