തുടരും ഗംഭീര സിനിമയാണെന്നും മോഹൻലാലിനെക്കൊണ്ട് മാത്രമേ ആ സിനിമ ചെയ്യാൻ കഴിയുകയുള്ളൂ എന്നും പ്രശസ്ത തമിഴ് സംവിധായകൻ സെൽവരാഘവൻ. ഇന്ത്യയിലെ ഏറ്റവും മികച്ച നടനെ കണ്ട് ഞാൻ അത്ഭുതപ്പെട്ടുപോയി എന്നും സെൽവരാഘവൻ എക്സിൽ കുറിച്ചു.
‘തുടരും ഗംഭീര സിനിമയാണ്. മോഹൻലാൽ സാറിന് മാത്രമേ ഈ സിനിമ ചെയ്യാൻ കഴിയൂ. എന്തൊരു നടനാണ് അദ്ദേഹം. ഇന്ത്യയിലെ ഏറ്റവും മികച്ച നടനെ കണ്ട് ഞാൻ അത്ഭുതപ്പെട്ടുപോയി’ എന്നാണ് സെൽവരാഘവൻ കുറിച്ചത്.
കഴിഞ്ഞ ദിവസം ബോളിവുഡ് സംവിധായകൻ സഞ്ജയ് ഗുപ്തയും തുടരുമിനെ പ്രശംസിച്ച് എത്തിയിരുന്നു. ‘എന്തൊരു സിനിമ!!! ദൃശ്യത്തിന് മുകളിൽ പോയിട്ടില്ലെങ്കിലും അതിനൊത്തുള്ളത് ഉണ്ട്. വേറെ ലെവലാണ് മോഹൻലാൽ സാർ. മസ്റ്റ് മസ്റ്റ് വാച്ച്!!!”, എന്നാണ് സഞ്ജയ് ഗുപ്ത കുറിച്ചത്.
അതേസമയം, ഒടിടിയിൽ എത്തിയതിന് ശേഷവും തുടരുമിന് തിയേറ്ററിൽ മികച്ച ബുക്കിങ് ലഭിക്കുന്നു എന്ന റിപ്പോർട്ടുകളാണ് കഴിഞ്ഞ ദിവസങ്ങളിൽ വന്നത്. അതേസമയം, ഏപ്രിൽ 25ന് തിയേറ്ററുകളിലെത്തിയ തുടരും കേരളാ ബോക്സ് ഓഫീസിൽ നിന്ന് 100 കോടി കളക്ട് ചെയ്യുന്ന ആദ്യ മലയാളം സിനിമ കൂടിയാണ്.