പൊതുവേദിയില് കുഴഞ്ഞു വീണ നടന് വിശാലിന്റെ ആരോഗ്യനില തൃപ്തികരമെന്ന് റിപ്പോര്ട്ടുകള്. ഭക്ഷണമൊന്നും കഴിക്കാത്തതാണ് നടന് തലചുറ്റല് വന്ന് ബോധരഹിതനാകാന് കാരണമായത് എന്നാണ് റിപ്പോര്ട്ടുകള്. വില്ലുപുരത്ത് സംഘടിപ്പിച്ച സൗന്ദര്യമത്സരത്തിന് ആശംസകള് അറിയിച്ച് തിരിച്ചു പോകവെയാണ് ഇന്നലെ വിശാല് ബോധരഹിതനായി കുഴഞ്ഞുവീണത്.
കൂവാഗം കൂത്താണ്ടവര് ക്ഷേത്രത്തിലെ ഉത്സവത്തോട് അനുബന്ധിച്ച് ട്രാന്സ്ജെന്ഡറുകള്ക്കായി സൗന്ദര്യ മത്സരം ഒരുക്കാറുണ്ട്. മത്സരം കാണാനും വിലയിരുത്താനും വിശിഷ്ടാതിഥിയായാണ് വിശാല് എത്തിയത്. ആരോഗ്യവുമായി ബന്ധപ്പെട്ട് വിശാലിന് മറ്റ് പ്രശ്നങ്ങളില്ലെന്നും ഭക്ഷണം കൃത്യമായ സമയത്ത് കഴിക്കണമെന്ന് മെഡിക്കല് ടീം നിര്ദേശിച്ചിട്ടുണ്ടെന്നും നടന്റെ ടീം വ്യക്തമാക്കി.
അതേസമയം, നേരത്തെയും പൊതുവേദിയില് നടന് മോശം ആരോഗ്യാവസ്ഥയില് പ്രത്യക്ഷപ്പെട്ടിരുന്നു. ‘മദ ഗദ രാജ’യുടെ റിലീസുമായി ബന്ധപ്പെട്ട് നടന്ന ഓഡിയോ ലോഞ്ച് ചടങ്ങില് കടുത്ത പനിയും വിറയലോടെയുമാണ് വിശാല് എത്തിയത്. താരത്തിന്റെ ആരോഗ്യാവസ്ഥ ചര്ച്ചയാവുകയും ചെയ്തിരുന്നു.
തുപ്പരിവാലന് 2 എന്ന ചിത്രമാണ് വിശാലിന്റെതായി ഇനി റിലീസിന് ഒരുങ്ങുന്നത്. ചിത്രത്തിന്റെ സംവിധാനവും വിശാല് തന്നെയാണ്. 2017ല് പുറത്തിറങ്ങിയ തുപ്പരിവാലന് എന്ന ചിത്രത്തിന്റെ രണ്ടാം ഭാഗമാണിത്. ആദ്യ ചിത്രം മിഷ്കിന് ആയിരുന്നു സംവിധാനം ചെയ്തത്.