സൗബിന് ഷാഹിറും സുരാജ് വെഞ്ഞാറമൂടും കേന്ദ്ര കഥാപാത്രങ്ങളായി എത്തുന്ന “വികൃതി” തിയേറ്ററുകളിലേക്കെത്താന് ഇനി രണ്ട് നാള് കൂടി. ഒക്ടോബര് നാലിന് ചിത്രം പ്രേക്ഷകര്ക്ക് മുന്നിലേക്കെത്തും. കൊച്ചി മെട്രോയില് മദ്യപിച്ചു കിടന്നുറങ്ങിയെന്ന പേരില് അപമാനിക്കപ്പെട്ട ശാരീരിക പരിമിതികളുള്ള അങ്കമാലി സ്വദേശി എല്ദോയുടെ കഥയാണ് ചിത്രം പറയുന്നത്.
കൊച്ചി മെട്രോയിലെ “പാമ്പ്” എന്ന തലക്കെട്ടോടെ എല്ദോ മെട്രോയില് കിടക്കുന്ന ദൃശ്യങ്ങള് സോഷ്യല് മീഡിയയില് പ്രചരിച്ചിരുന്നു. സുരാജ് വെഞ്ഞാറമൂടാണ് എല്ദോ ആയി എത്തുന്നത്. ഫോട്ടോ എടുത്ത് പ്രചരിപ്പിച്ച വ്യക്തിയുടെ വേഷമാണ് സൗബിന് കൈകാര്യം ചെയ്യുന്നത്. സുരഭി ലക്ഷ്മിയാണ് എല്ദോയുടെ ഭാര്യയായി എത്തുന്നത്. സംസാരശേഷിയില്ലാത്ത കഥാപാത്രമായാണ് സുരഭി എത്തുന്നത്.
ബാബുരാജ്, വിന്സി, ഭഗത് മാനുവല്, സുധി കോപ്പ, ഇര്ഷാദ്, ജാഫര് ഇടുക്കി, സുധീര് കരമന, മേഘനാഥന്, മാമുക്കോയ, നെബീഷ്, ബിട്ടോ ഡേവീസ്, അനിയപ്പന്, നന്ദകിഷോര്, സുരഭി ലക്ഷ്മി, മറീന മൈക്കിള്, ഗ്രേസി, റിയ, മമിത ബൈജു, പൗളി വത്സന്, ലിസി ജോസ്, ജോളി ചിറയത്ത് തുടങ്ങിയവരും ചിത്രത്തില് അണിനിരക്കുന്നു. കട്ട് 2 ക്രിയേറ്റ് പിക്ച്ചേഴ്സിന്റെ ബാനറില് എ. ഡി ശ്രീകുമാര്, ഗണേഷ് മേനോന്, ലക്ഷ്മി വാര്യര് എന്നിവര് ചേര്ന്നാണ് ചിത്രം നിര്മ്മിക്കുന്നത്.