ആദായനികുതി ഉദ്യോഗസ്ഥരുടെ പരിശോധനയെ തുടര്ന്നുണ്ടായ ബഹളങ്ങള്ക്ക് ശേഷം ലൊക്കേഷനിലെത്തിയ വിജയ്ക്ക് വമ്പന് വരവേല്പ്പാണ് ആരാധകര് നല്കിയത്. ഇതിന്റെ വീഡിയോ സോഷ്യല് മീഡിയയില് വൈറലായിരുന്നു. മാസ്റ്റര് സിനിമയുടെ ചിത്രീകരണത്തിനായി എത്തിയ വിജയ് തന്റെ കാരവാനിന് മുകളില് കയറി ആരാധകര്ക്കു നേരെ കൈവീശുന്നതും സെല്ഫികള് പകര്ത്തുന്നതുമായ വീഡിയോയാണ് വൈറലായത്. ഇപ്പോഴിതാ കാരവാന് മുകളില് നിന്ന് വിജയ് പകര്ത്തിയ സെല്ഫി പുറത്തു വന്നിരിക്കുകയാണ്. വിജയ് തന്നെയാണ് നന്ദി അറിയിച്ചു കൊണ്ട് ചിത്രം പങ്കുവെച്ചത്. നിമിഷനേരം കൊണ്ടാണ് ചിത്രം സോഷ്യല് മീഡിയയില് വൈറലായത്. ഈ ചിത്രം മലയാള സിനിമ താരങ്ങളടക്കം നിരവധി പേരാണ് പങ്കുവെച്ചിരിക്കുന്നത്.
മാസ്റ്റര് സിനിമയുടെ ചിത്രീകരണത്തിനിടെയായിരുന്നു താരത്തെ ആദായനികുതി വകുപ്പ് ചോദ്യം ചെയ്യുന്നതിനായി കൊണ്ടുപോയത്. “ബിഗില്” സിനിമയുടെ സാമ്പത്തിക ഇടപാടുകള് അന്വേഷിക്കുന്നതിന്റെ ഭാഗമായായിരുന്നു നടപടി. വിജയിനെ വീണ്ടും ചോദ്യം ചെയ്യാനും നീക്കമുണ്ട്. മൂന്നു ദിവസത്തിനകം ഹാജരാകാന് ആവശ്യപ്പെട്ട് വിജയ്ക്ക് ആദായനികുതി വകുപ്പ് നോട്ടിസ് നല്കിയിട്ടുണ്ട്.
പുതിയ സംഭവങ്ങളുടെ പശ്ചാത്തലത്തില് വിജയ് യുടെ രാഷ്ട്രീയപ്രവേശനം ഉറപ്പിച്ചിരിക്കുകയാണ് ആരാധകര്. ബി.ജെ.പി.ക്ക് തിരിച്ചടി കൊടുക്കാന് ദളപതി രാഷ്ട്രീയത്തിലേക്ക് എന്ന പ്രചാരണം സോഷ്യല് മീഡിയയില് സജീവമായിരിക്കുകയാണ്. മകന് രാഷ്ട്രീയത്തില് വരാനുള്ള സാദ്ധ്യതയുണ്ടെന്ന് വിജയ് യുടെ അച്ഛനും നിര്മ്മാതാവമായ എസ്.എ. ചന്ദ്രശേഖര് നേരത്തെ പറഞ്ഞിരുന്നു.