സുരേഷ് ഗോപി, ശോഭന, ദുല്ഖര് സല്മാന്, കല്യാണി പ്രിയദര്ശന്, തുടങ്ങിയവര് പ്രധാന കഥാപാത്രങ്ങളാക്കി അനൂപ് സത്യന് ഒരുക്കിയ വരനെ ആവശ്യമുണ്ടതിന്റെ കളക്ഷന് റിപ്പോര്ട്ട് പുറത്തുവിട്ടു. പുറത്തിറങ്ങി രണ്ടാഴ്ച്ച പിന്നിടുമ്പോള് 25 കോടി രൂപയാണ് ചിത്രത്തിന്റെ ആഗോള കളക്ഷന്. ദുല്ഖറിന്റെ പ്രൊഡക്ഷന് കമ്പനിയായ വേഫെയ്റര് ഫിലിംസ് ആണ് കളക്ഷന് റിപ്പോര്ട്ട് ഔദ്യോഗികമായി പുറത്തുവിട്ടത്.
ദുല്ഖറിന്റെ ആദ്യ നിര്മ്മാണ സംരഭമായ ചിത്രം ഈ മാസം എഴിനായിരുന്നു തിയേറ്ററുകളിലെത്തിയത്. ദുല്ഖര് സല്മാന്റെ പ്രൊഡക്ഷന് കമ്പനിയായ വേഫെയ്റര് ഫിലിംസും എം സ്റ്റാര് ഫിലിംസും ചേര്ന്നാണ് ചിത്രം നിര്മ്മിച്ചിരിക്കുന്നത്. സുരേഷ് ഗോപിയും ശോഭനയും ഒരുപാട് നാളുകള്ക്ക് ശേഷം ഒന്നിച്ച് അഭിനയിക്കുന്നു എന്ന പ്രത്യേകതയും സിനിമയ്ക്കുണ്ട്. സിന്ദൂരരേഖ, മണിച്ചിത്രത്താഴ്, രജപുത്രന്, കമ്മീഷ്ണര് അങ്ങനെ നിരവധി ചിത്രങ്ങളിലൂടെ പ്രേക്ഷക മനസില് ഇടം നേടിയ ഈ ജോഡി പതിമൂന്ന് വര്ഷങ്ങള്ക്കു ശേഷമാണ് വീണ്ടുമൊരു ചിത്രത്തിന് വേണ്ടി ഒന്നിക്കുന്നത്.
അനൂപ് തന്നെ തിരക്കഥയെഴുതുന്ന ഹ്യൂമറിന് പ്രാധാന്യം നല്കുന്ന ഒരു കുടുംബചിത്രമാണ്. ചെന്നൈയില് നടക്കുന്ന കഥയാണ് ചിത്രം പറയുന്നത്.