ആസിഡ് ആക്രമണത്തിന് ഇരയായ പെണ്കുട്ടിയുടെ ജീവിതം പ്രമേയമാക്കി നവാഗതനായ മനു അശോക് ഒരുക്കുന്ന ചിത്രമാണ് ഉയരെ. ആസിഡ് ആക്രമണത്തെ അതിജീവിച്ച പല്ലവി എന്ന പെണ്കുട്ടിയായി പാര്വ്വതി എത്തുന്ന ചിത്രത്തില് ടൊവിനോ തോമസ്, ആസിഫ് അലി എന്നിവരും പ്രധാന വേഷങ്ങളിലെത്തുന്നു. ചിത്രത്തിലെ പാര്വതിയുടെ ലുക്കാണ് ഇപ്പോള് സോഷ്യല് മീഡിയയില് വൈറലാകുന്നത്. പൈലറ്റിന്റെ വേഷത്തിലുള്ള ചിത്രമാണ് പുറത്തു വന്നിരിക്കുന്നത്. ചിത്രത്തിന്റെ അണിയറ പ്രവര്ത്തകര് ഔദ്യോഗികമായി ഇത്തരമൊരു പോസ്റ്റര് പുറത്തു വിട്ടിട്ടില്ലെങ്കിലും പാര്വതിയുടെ ലുക്ക് ഇതിനോടകം സോഷ്യല് മീഡിയയില് വൈറലായിട്ടുണ്ട്.
ചിത്രത്തില് ആസിഫ് അലി ഗോവിന്ദ് എന്ന കഥാപാത്രത്തെയും ടൊവിനോ വിശാല് എന്നകഥാപാത്രത്തെയുമാണ് അവതരിപ്പിക്കുന്നത്. ഇവരെ കൂടാതെ “ലില്ലി”യിലൂടെയും “തീവണ്ടി”യിലൂടെയും ശ്രദ്ധേയയായ സംയുക്ത മേനോനും “ആനന്ദ”ത്തിലൂടെയും “മന്ദാര”ത്തിലൂടെയും ശ്രദ്ധേയയായ അനാര്ക്കലി മരയ്ക്കാറും ചിത്രത്തില് അഭിനയിക്കുന്നുണ്ട്. പാര്വതിയുടെ അച്ഛന്റെ വേഷത്തില് രഞ്ജി പണിക്കറാണ് വേഷമിടുന്നത്. പ്രതാപ് പോത്തന്, പ്രേം പ്രകാശ് എന്നിവരാണ് മറ്റു പ്രധാന താരങ്ങള്.
കൊച്ചി, മുംബൈ, ആഗ്ര എന്നിവിടങ്ങളാണ് ചിത്രത്തിന്റെ പ്രധാന ലൊക്കേഷനുകള്. ബോബി, സഞ്ജയ് എന്നിവര് ചേര്ന്നാണ് ചിത്രത്തിന്റെ തിരക്കഥ ഒരുക്കിയിരിക്കുന്നത്. എസ്ക്യൂബ് പ്രൊഡക്ഷന്സിന്റെ ബാനറില് പി വി ഗംഗാധരന്റെ മക്കളായ ഷേനുഗ, ഷേഗ്ന, ഷേര്ഗ എന്നിവര് ചേര്ന്നാണ് ചിത്രം നിര്മ്മിക്കുന്നത്. സംഗീതം ഗോപിസുന്ദറാണ്. ചിത്രം അടുത്ത മാസം തിയേറ്ററുകളിലെത്തും.