ഖാലിദ് റഹമാന്റെ സംവിധാനത്തില് മമ്മൂട്ടി നായകനായെത്തിയ ഉണ്ട വിജയകരമായി മൂന്നാം വാരത്തിലേക്ക് കടന്നിരിക്കുകയാണ്. ഇപ്പോഴിതാ ചിത്രത്തിന്റെ വിജയത്തില് ട്രോളന്മാര്ക്ക് നന്ദി പറഞ്ഞെത്തിയിരിക്കുകയാണ് സംവിധായകന്.
പേരിനെ കളിയാക്കിയും ഈ പേര് വെച്ചും അനേകം ട്രോളുകള് ആണ് സോഷ്യല് മീഡിയയില് നിറഞ്ഞത്. ആ ട്രോളുകള് തന്നെ ഈ ചിത്രത്തിന് വലിയ പ്രമോഷനും നേടിക്കൊടുത്തു. ഈ സിനിമ ജനങ്ങളുടെ ഇടയിലേക്ക് എത്താന് ട്രോളുകള് സഹായിച്ചു എന്നും ഖാലിദ് റഹമാന് പറയുന്നു ട്രോളന്മാര്ക്കു ഉണ്ട നന്നായി ഇഷ്ടപ്പെട്ടു എന്നും അദ്ദേഹം കൂട്ടിച്ചേര്ത്തു.
യഥാര്ത്ഥ സംഭവത്തെ ആസ്പദമാക്കിയാണ് ഉണ്ട ഒരുക്കിയിരിക്കുന്നത്. ഛത്തീസ്ഗഢിലേക്ക് തിരഞ്ഞെടുപ്പ് ജോലിക്ക് പോകുന്ന മലയാളി പൊലീസ് സംഘത്തിന്റെ കഥയാണ് ചിത്രം പറയുന്നത്. ഖാലിദ് റഹമാന് സംവിധാനം ചെയ്യുന്ന ചിത്രത്തിന് തിരക്കഥ ഒരുക്കിയിരിക്കുന്നത് ഹര്ഷാദാണ്.
സബ് ഇന്സ്പെക്ടര് മണികണ്ഠന് സി.പി എന്ന കഥാപാത്രത്തെയാണ് മമ്മൂട്ടി ചിത്രത്തില് അവതരിപ്പിക്കുന്നത്.ചിത്രത്തില് ദിലീഷ് പോത്തന്, കലാഭവന് ഷാജോണ്, ഷൈന് ടോം ചാക്കോ, ജേക്കബ് ഗ്രിഗറി, അര്ജുന് അശോകന്, സംവിധായകന് രഞ്ജിത്ത് എന്നിവരും വേഷമിടുന്നു. ആസിഫ് അലി, വിനയ് ഫോര്ട്ട്, സുധി കോപ്പ എന്നിവര് അതിഥി വേഷത്തിലും ചിത്രത്തിലെത്തുന്നുണ്ട്. സജിത് പുരുഷനാണ് ഛായാഗ്രഹണം നിര്വഹിച്ചിരിക്കുന്നത്. പ്രശാന്ത് പിള്ളയാണ് സംഗീതം.